Удирдах ажилтнуудын шуурхай зөвлөгөөний тойм

Удирдах ажилтнуудын даваа гаргийн ээлжит шуурхай зөвлөгөөний эхэнд үйлдвэрийн газрын хэмжээнд хийгдсэн хоёр томилгоог танилцууллаа. Тус үйлдвэрийн Ерөнхий захирлын энэ сарын 04-ний өдрийн тушаалаар Механикийн хэлтсийн Төлөвлөлт, мониторингийн албаны тэргүүлэх механик инженер С.Ганцогтыг Чанарын хяналтын хэлтсийн даргаар, Механикийн хэлтсийн Өргөн тээвэрлэх машин механизмын хяналтын товчооны инженер П.Лхагвасүрэнг Ус хангамжийн цехийн ерөнхий инженерээр тус тус томилсон байна. Эдгээр томилгоо нь тушаал гарсан өдрөөс эхлэн хэрэгжих бөгөөд шинэ албанд томилогдож буй ажилтнуудад үйлдвэрийн удирдлагын зүгээс ажлын амжилт хүслээ. 
Өнгөрсөн долоо хоногт хөдөлмөрийн аюулгүй байдлын хүрээнд өндөр эрсдэлтэй 15 ажил хийгдсэний 4 нь галын ажил байв. 23 аюулыг илрүүлж ажиллажээ. Мөн үйлдвэрийн чиглэл хариуцсан менежерүүдэд хөдөлмөрийн аюулгүй байдлын сургалт зохион байгуулж, сургалтын үеэр гаргасан санал санаачилгуудыг ажил хэрэгчээр хэрэгжүүлэх болсныг хэлтсийн мэдээлэлд онцоллоо. 
Байгаль орчин, ногоон хөгжлийн хэлтсээс аюултай хог хаягдлыг дахин боловсруулах, устгах зөвшөөрөл бүхий аж ахуйн нэгжид 100 гаруй ширхэг хуванцар сав, 4.5 тонн хаягдал шуудай, 0.2 тонн шил зэрэг нийт 9.5 тонн аюултай хог хаягдлыг шилжүүлэн өгчээ. Орхон аймгийн Баян-Өндөр сумын Засаг даргын 2 дугаар сарын 21-ний өдрийн захирамжаар “Ой хээрийн гал түймрээс урьдчилан сэргийлэх, хамгаалах” ажлыг эрчимжүүлэх хүрээнд энэ сарын 7-ноос 9-ний өдрүүдэд Эрдэнэт үйлдвэр хяналт эргүүлийн ажлыг зохион байгуулна. Энэ ажлыг үйлдвэрийн Гамшгаас хамгаалах штаб, Гал унтраах 58 дугаар ангитай хамтран хийж буйг Байгаль орчин, ногоон хөгжлийн хэлтэс мэдээлэв. Цагаан тоосны нөлөөллийн бүсэд амьдарч буй иргэдийг эрүүл мэндийн урьдчилан сэргийлэх үзлэгт хамруулж эхэлсэн байна. Энэ ажилтай холбоотой асуудлыг цаг тухайд нь шийдвэрлээд ажиллаж буй ажээ. 
Үйлдвэрлэл өнгөрсөн долоо хоногт хэвийн үргэлжилж байна. Шинэ долоо хоногт уулын цул гаргалт 636.9 мянган метр куб, хөрс хуулалт 243 мянган метр куб, хүдэр боловсруулалт 798 мянган тоннд хүргэхээр төлөвлөсөн. Ачилтын төлөвлөгөөг өдөрт 27-28 вагон ачихаар ажиллаж байгаа аж. 
Хавар, зуны бэлтгэл ажлын төлөвлөгөөг хэрэгжүүлэх тухай Ерөнхий захирлын тушаал батлагдсантай холбогдуулан бүтцийн цех, нэгжүүд дулааны улиралд бэлдэх ажилдаа ороод буйг мөн мэдээлэв. Баяжуулах үйлдвэрийн үйлдвэрлэлийн горим хэвийн үргэлжилж, бүтээн байгуулалтын төсөл, хөтөлбөрүүд төлөвлөгөөний дагуу хэрэгжиж байна. Хүдэр бэлтгэлийн нэгдүгээр шатны шугам шинэчлэлийн ажлын хүрээнд нийт 200 орчим тонн ачаа татан авч буулгаад байна. Газар шорооны ажлыг ирэх 6 дугаар сард эхлүүлэхээр төслийн баг ажиллаж байгаа юм. 
Засвар, механикийн заводын үйлдвэрлэлийн төлөвлөгөөний биелэлт 21.9 хувьтай үргэлжилж байгааг шуурхай зөвлөгөөнд танилцууллаа. Өргөтгөл шинэчлэлийн ажлын хангамж нийлүүлэлтийн асуудлаар холбогдох хэлтэс, нэгжтэй хамтран, цаг тухайд нь шийдвэрлэн ажиллаж байна гэж заводын Ерөнхий инженер мэдээлэв. Дулааны цахилгаан станцын үйлдвэрлэлийн горим хэвийн байна. Мөн тус цехэд БНХАУ-ын Харбин хотын зуух үйлдвэрлэгч компанийн удирдлага, инженер мэргэжилтнүүдийн баг ажиллаж байгаа аж. 
“Их зогсолт”-ын бэлтгэл хангах ажлын штабын хурлыг Ерөнхий захирлын тушаалд заасан хугацаанд хуралдуулж, шийдвэрээ удирдах ажилтны өргөтгөсөн шуурхай зөвлөгөөнд мэдээлж байх үүрэг чиглэл шуурхайн төгсгөлд өглөө.