Төв корпусын цахилгаан хуваарилах самбарыг шинэчиллээ

Хөрөнгө оруулалт, бүтээн байгуулалтын чиглэлээр Цахилгаан цехэд шинэчлэл хийх ажил үргэлжилж байна. Төв корпусын РП-1, 2. ТК дэд станцын 0,4 кВ-ын I ба II секцийн бүрэн шинэчлэлийн ажил дуусаж, ашиглалтад орлоо. 
Уг дэд станц нь 1978 онд ОХУ-д үйлдвэрлэсэн, Эрдэнэт үйлдвэрт тасралтгүй 45 жил ажиллаж байгаа бөгөөд ашиглалтад орсноос хойш техникийн шинэчлэлт хийгдээгүй, тоноглолуудын хугацаа дууссан, сэлбэг хэрэгсэл олдоцгүй болсноос урсгал засвар хийх боломжгүй болжээ. Мөн 6/0.4 кВ дотоод хэрэгцээний хэлхээ нь хүчдэл тохируулагчгүйгээс орчин үеийн өндөр хүчдэлийн цахилгаан тоног төхөөрөмжтэй уялдаж ажиллаж чадахгүй, тоног төхөөрөмж гэмтээх өндөр эрсдэл үүссэн тул шинэ тоноглол суурилуулах шаардлага бий болсон. 
Иймээс эрчим хүчний зохицуулалт, автоматжуулалтын чиглэлээр дэлхийд тэргүүлэгч “Шнайдер Электрик” компанийн автомат таслуураар тоноглогдсон, БНХАУ-ын “COTTON” компанид үйлдвэрлэгдсэн 0,4-ийн кВ-ийн хуваарилах самбараар шинэчлэх ажлыг “Оркон тех” ХХК амжилттай гүйцэтгэж, ажилд орууллаа. Ингэснээр үйлдвэрлэлийг цахилгаан эрчим хүчээр тасралтгүй найдвартай хангах, олон давхар үүрэгтэй хуваарилах самбарын найдварт ажиллагаа хангагдаж байна.