Удирдах ажилтнуудын шуурхай зөвлөгөөний тойм

Даваа гаргийн ээлжит шуурхай зөвлөгөөн ХАБЭА-н өнгөрсөн долоо хоногийн ажлын тайлангаар эхэллээ. Тус хэлтсээс өндөр эрсдэлтэй 29 ажлын байранд хяналт тавьж, галын 5 ажил хийсэн байна. Эдгээрээс 14 зөрчил дутагдал илрүүлж, холбогдох хүмүүст шаардлага, үүрэг даалгавар өгсөн байна. Нийт 420 орчим хүнд хөдөлмөрийн аюулгүй байдлын сургалт, хичээл зохион байгуулж, гаднын байгууллагын 19 ажилтан хамрагдсан байна. Ирэх баасан гарагт ХАБЭА-н сарын зөвлөгөөнийг зохион байгуулна гэж хэлтсийн мэдээлэлд онцлов. 
Өнгөрсөн долоо хоногт Хаягдлын аж ахуйн цагаан тоосны дэгдэлт нэмэгдсэн тул Баяжуулах үйлдвэртэй хамтран цагаан тоос дарах ажлыг эрчимжүүлж байна. Мөн цагаан тоосны нөлөөллийн бүсэд амьдардаг иргэдийг эрүүл мэндийн үзлэгт хамруулах ажлыг 4 дүгээр сарын 07-ноос эхлүүлнэ. Энэ удаагийн эрүүл мэндийн үзлэгт 500 иргэнийг хамруулах юм байна. 
Энэ долоо хоногийн пүрэв гарагт ХБНГУ-аас Монгол Улсад суугаа Онц бөгөөд Бүрэн эрхт Элчин сайд Эрдэнэт үйлдвэртэй танилцахаар хүрэлцэн ирэх юм байна. Гадаад харилцаа, экспортын хэлтэс, Хүний нөөц, захиргааны хэлтэс хамтран, айлчлалын бэлтгэл ажлыг хангаж байгааг мэдээлэв. Оны эхний улиралд үйлдвэрлэлийн үзүүлэлт болон борлуулалтын орлогын төлөвлөгөө давж биелсэн байна.
Оны эхний улиралд үйлдвэрлэлийн үндсэн үзүүлэлтүүд болон эдийн засаг, борлуулалтын орлогын төлөвлөгөө биелсэн байна. Хоёрдугаар улиралд энэхүү амжилтаа баталж ажиллах шаардлагатай. Түүнчлэн, хоёрдугаар улиралд баяр, амралтын өдрүүд харьцангуй цөөн учраас үйлдвэрлэлийн төлөвлөгөөний биелэлтэд эергээр нөлөөлдөг. Тиймээс энэ улиралд үйлдвэрлэлийн үзүүлэлт болон бусад бүтээн байгуулалт, “Их зогсолт”-ын бэлтгэл гэх зэрэг үйлдвэрлэлийн төлөвлөгөөт ажлуудаа хуваарийн дагуу гүйцэтгэж, эрчимжүүлж ажиллахыг Ерөнхий захирал онцлов. 
Мөн хаврын хуурайшилттай болон бороо усны улирал ойртож байгаа учраас бүтээн байгуулалтын газар шороо, дээврийн засвар, гал түймрээс урьдчилан сэргийлэх ажлуудаа эртнээс төлөвлөн эхэлж, бүтцийн цех, нэгжүүдтэй хамтран хийж гүйцэтгэхийг Ерөнхий инженер шуурхай зөвлөгөөний төгсгөлд анхаарууллаа.