Билгийн тооллын Арван долдугаар жарны “Элдэв эрдэнэт” хэмээх Хөхөгчин модон могой жилийн Сар шинийн баярыг тохиолдуулан Монгол Улсын Ерөнхийлөгчийн зарлигаар Эрдэнэт үйлдвэрийн Ил уурхайн дарга Д.Нямдорж Монгол Улсын Гавьяат уурхайчин цол, тэмдэг хүртлээ.
Тэрээр 2002 оноос тэсрэх бодисын тэсрэлтийн хүчин чадлыг бууруулахгүйгээр хямд өртөгтэй эмульсийн тэсрэх бодисын 2 төрлийн шинэ найрлага боловсруулан туршиж, стандарт батлуулан үйлдвэрлэлд нэвтрүүлсэн. Цооногийн цэнэгийн туслах цэнэг байрлуулах хоолой ашигтай загварыг тэсэлгээний ажилд нэвтрүүлснээр Ил уурхайд цооногийн дээд цэнэгийн цэнэглэлтийн технологи, аюулгүй ажиллагаа сайжирч, тэсэлгээчний ажлын хөдөлмөр зарцуулалт багасаж, 2020-2024 онд 100 гаруй сая төгрөгийн цэвэр эдийн засгийн үр ашигтай ажиллажээ.
Үйлдвэрлэлийн хэлтсийн орлогч даргаар ажиллахдаа үйлдвэрлэлийн болон бизнес төлөвлөгөөг бүх нэр төрөл, чанараар нь бүтцийн нэгж, хэлтсүүдтэй хамтран боловсруулж, тэдгээрийн биелэлтийг хангах, үндсэн үйлдвэрлэлийн жил, улирлын төлөвлөгөө, хүдэр олборлолт, боловсруулалт, бүтээгдэхүүн үйлдвэрлэлийн сар, долоо хоногийн төлөвлөгөөт графикийг боловсруулах ажлыг удирдан зохион байгуулж, үндсэн тоног төхөөрөмж болон тээврийн хэрэгслийн сул зогсолтгүй, найдвартай ажиллагааг хангаж ажилласан байна.
Монгол Улсын Гавьяат уурхайчин Д.Нямдорж нь гурван шинэ бүтээлийн патент, нэг ашигтай загварын гэрчилгээ эзэмшиж, дөрвөн оновчтой санал гаргаж, үйлдвэрлэлд бүрэн нэвтрүүлсэн ажлын арвин дадлага туршлагатай чадварлаг мэргэжилтэн юм. Ийнхүү Сар шинийн баярын босгон дээр Эрдэнэт үйлдвэрээс 83 дахь гавьяат төрлөө.
Нар минутад мандаж минутад жаргана.
Үс засуулвал: 
Суудал: 
