Монгол Улсын Засгийн газрын 2024-2028 оны үйл ажиллагааны хөтөлбөрт тусгагдсан "Эрсдэлийг урьдчилан илрүүлэх, үнэлэх, эрэмбэлэх, хариу арга хэмжээ авах, хэрэгжилтэд үнэлгээ хийх системийг хөгжүүлж, эрсдэлийн удирдлагын шинэчлэлийг эхлүүлэх" арга хэмжээний хүрээнд төрийн байгууллагын үйл ажиллагаанд эрсдэлийн удирдлагын талаар баримтлах бодлогыг батлуулах, эрх зүйн орчныг боловсронгуй болгох, эрсдэлийн удирдлагын тогтолцоог бэхжүүлэх, ойлголт, мэдлэг, хандлагыг дээшлүүлэх ажлуудыг үе шаттай хэрэгжүүлэхээр эхлүүлээд байна.
Энэ ажлын хүрээнд Засгийн газрын Хяналт хэрэгжүүлэх газраас төрийн байгууллагад эрсдэлийн удирдлагыг хэрэгжүүлэх бодлого, заавар, гарын авлагын төслийг боловсруулж, "Төрийн байгууллагын эрсдэлийн удирдлагын өнөөгийн байдал" судалгааны ажлыг хийж гүйцэтгэсэн.
Дээрх баримт бичгүүдийн төслийг хэлэлцүүлж, холбогдох байгууллагуудын саналыг тусгах, судалгааны үр дүнг танилцуулах, эрсдэлийн удирдлагыг хэрэгжүүлсэн талаарх олон улсын болон дотоодын сайн туршлагаас хуваалцах зорилгоор "Төрийн байгууллагад эрсдэлийн удирдлагыг хэрэгжүүлэх нь" хэлэлцүүлгийг Улаанбаатар хотноо өнөөдөр зохион байгуулж байна.
Улаанбаатар зочид буудлын Их танхимд зохион байгуулагдаж буй тус үйл ажиллагаанд Монгол Улсын Сайд, Хяналт, үнэлгээний үндэсний хорооны дарга Э.Одбаяр, Үндэсний аудитын газрын Эрсдэлийн удирдлагын газрын захирал Д.Отгонбаяр, Сангийн яамны Санхүүгийн хяналт, эрсдэлийн удирдлагын газрын Дотоод аудит, хяналт-шинжилгээ, үнэлгээний хэлтсийн дарга Г.Отгонбаяр, “Эрдэнэс Монгол” нэгдлийн Төлөөлөн удирдах зөвлөлийн дэргэдэх Дотоод аудитын газрын Ерөнхий аудитор О.Баярмагнай нарын зочид болон Засгийн газрын Хяналт хэрэгжүүлэх газрын дарга Ч.Өнөрбаяр, тус газрын удирдлагууд, мэргэжилтнүүд болон төрийн болон төрийн өмчийн оролцоотой, олон улсын, хувийн хэвшлийн, судалгааны 86 байгууллагын 160 орчим төлөөлөл оролцож байна.
Хэлэлцүүлгийг нээж Монгол Улсын Сайд, Хяналт, үнэлгээний үндэсний хорооны дарга Э.Одбаяр хэлсэн үгэндээ, “Өнгөрсөн 2024 оны Улсын Их Хурлын ээлжит сонгуулийн үр дүнд байгуулагдсан томсгосон тойргоор олон мандаттай, бүсчилсэн шинэ системээр явсан, сонгуулийн үр дүнд байгуулагдсан парламент, түүнээс бүрдсэн шинэ хамтарсан засгийн хүрээнд Монгол Улсын шинээр байгуулагдсан Засгийн газар маань үйл ажиллагааныхаа хөтөлбөртөө Эдийн засгийн хөгжлийн бодлого, Хүний хөгжлийн бодлого, Бүсчилсэн хөгжлийн бодлого, Хүний эрхэд суурилсан засаглалын бодлого гэсэн үндсэн бодлогын хүрээнд нийтдээ 16 чиглэлийн 120 хөтөлбөр, арга хэмжээг төлөвлөн ажиллаж байгаа. Тухайлбал, эрчим хүчний салбарын шинэчлэлийг эхлүүлэх, эрчим хүчний дотоодын үйлдвэрлэлийг нэмэгдүүлж, хэрэгцээгээ бүрэн хангаж, цаашдаа экспортлогч улс болох, аж үйлдвэржилт, бүсчилсэн хөгжил зэрэг 14 мега төслийг хэрэгжүүлж, үүний үр дүнд хүний хөгжлийн үзүүлэлтийг 10 байраар урагшлуулж, засаглалын үзүүлэлтийг дунджаар 10 байраар ахиулах, ядуурлын түвшнийг 2 дахин багасгаж 14 хувьд хүргэх, нэг хүнд ноогдох дотоодын нийт бүтээгдэхүүнийг 10,000 долларт хүргэх зэрэг томоохон стратегийн зорилтуудыг хэрэгжүүлж байна. Монгол Улсын Засгийн газраас дэвшүүлсэн эдгээр бодлого, зорилтуудыг хэрэгжүүлэхэд төрийн захиргааны байгууллагуудын, мөн төрийн өмчит аж ахуйн нэгжүүд, төрийн болон орон нутгийн өмчит компаниудын хоорондын ажлын уялдаа холбоо, хууль ёсыг сахиулах, хариуцлагыг дээшлүүлэх, бүтээмжийг нэмэгдүүлэх чиглэлээр Хяналт, үнэлгээний үндэсний хороо, мөн 2022 онд батлагдсан “Засгийн газар дахь Хяналтын тухай хууль”-ийн дагуу байгуулагдсан Засгийн газрын Хяналт хэрэгжүүлэх газар маань эдгээр чиг үүргүүдийг хариуцаж ажиллаж байгаа юм.
Аливаа байгууллагын урт хугацааны амжилттай ажиллах үндэс нь эрсдэлийг урьдчилан тооцоолж, үнэлэх, хариу арга хэмжээ авах, оновчтой төлөвлөн хэрэгжүүлэх, үйл ажиллагааныхаа тогтвортой байдлыг хангах явдал байдаг. Төрийн байгууллагын эрсдэлийн удирдлагыг хэрэгжүүлснээр төрийн бүтээмж, хяналт сайжирч, засаглалын шинэ түвшинд гарна гэж үзэж байгаа. Засгийн газрын Хяналт хэрэгжүүлэх газрын зүгээс бусад төрийн байгууллагууддаа уриалж, энэ эрсдэлийн удирдлагын системийг төрийн тогтолцооны хүрээнд анх удаа ярьж, дэвшүүлж, санаачилж байгаад, түүнийг нь дэмжиж хамтарч оролцож байгаа та бүхэндээ талархал илэрхийлье. Монгол төрийн бодлого бүх шийдвэрүүд нотолгоо, судалгаанд үндэслэж гарах ёстой. Тэр шийдвэрүүд алдаа мадаггүй байхын тулд эрсдэлээ тодорхойлох, эрсдэлээс бусад бүх зүйлүүдийг төлөвлөлт, хяналт, хэрэгжилтийг нь цогц системээр, нэг цонхны бодлогоор хангах бодлого, зорилго бол хамгийн чухал. Төлөвлөлтөөс авхуулаад тайлагналд хүртэл бид нарт эрсдэлтэй зүйл, санамсаргүй зүйл аль болох бага байх ёстой. Цаашдаа бид нар энэ олон улсын үйл ажиллагаанд, ялангуяа энэ Азийн бүтээмжийн холбоотой хамтраад бид энэ төлөвлөлт, хяналт үнэлгээний шинэ системийг энэ газарт бүтээгээд ажиллаж байгаа, 2025 онд бас нэлээн ахиц гаргана гэж төлөвлөж байгаа. Нэг талаараа энэ төлөвлөлт, хяналт үнэлгээний шинэ системийг нэвтрүүлье. Нөгөө талаараа өнөөдөр яригдаж эхэлж байгаа энэ эрсдэлийн удирдлагын менежментийн шинэ тогтолцоог нэвтрүүлж чадсанаар Засгийн газрын бодлого, хөтөлбөрийн төлөвлөлт дараагийн шинэ шатанд гарна” гэдгийг онцолсон.
Тус хэлэлцүүлэгт “Төрийн байгууллагад эрсдэлийн удирдлагыг нэвтрүүлэхийн ач холбогдол, хүлээгдэж буй үр дүн”, “Төрийн байгууллагын эрсдэлийн удирдлагын тогтолцоо”, “Эрсдэлийн удирдлагын нэгдсэн тогтолцоо” зэрэг сэдвээр илтгэл хэлэлцүүлж байгаагаас гадна “Эрдэнэт үйлдвэр” ТӨҮГ-ын Дотоод хяналт, мониторингийн хэлтсийн хамт олон Эрсдэлийн удирдлагыг хэрэгжүүлсэн сайн туршлагаа хуваалцаж, “Эрсдэлийн удирдлагын хэрэгжилт, цаашид хэрэгжүүлэх арга хэмжээ” сэдвээр илтгэл тавих юм.
Мөн энэ өдрийн хөтөлбөр үдээс хойш “Эрсдэлийн удирдлагыг төрийн байгууллагад хэрэгжүүлэх арга зам” панел хэлэлцүүлгээр үргэлжилнэ.
Нар минутад мандаж минутад жаргана.
Үс засуулвал: 
Суудал: 
