Уурхайчид Хөдөлмөрийн аваргууддаа хүндэтгэл үзүүллээ

Эрдэнэт үйлдвэрийн Ил уурхайн хамт олон XYII жарны Хөхөгчин модон могой жилийн сар шинийн баярыг тохиолдуулан 2024 онд үйлдвэрлэлийн төлөвлөгөөт зорилтыг ханган биелүүлэхэд идэвх санаачилгатай, үр бүтээлтэй ажиллаж, мэргэжлийн ур чадвараараа журмын нөхдөө манлайлсан ажилтнуудаа “Хөдөлмөрийн аварга”-аар өргөмжлөх ёслол Ерөнхий захиргааны I байрны Хурлын зааланд боллоо. 
Модон луу жилийн “Хөдөлмөрийн аварга” уурхайчнаар Тоног төхөөрөмжийн засварчин Д.Нямцэрэн, Б.Мөнх-Эрдэнэ, Ахлах мастер-уурхайн диспетчер Б.Атарсайхан, Экскаваторын машинч Л.Буманбаатар, Тоног төхөөрөмжийн цахилгаанчин Б.Мөнхжин нарыг тодруулан алдаршуулж, 1.7 сая төгрөгийн шагнал хүртээсэн юм. Мөн Тэргүүлэх механик Белянкин Виталий Петрович, Өрөмдлөг тэсэлгээний хэсгийн ахмад ажилтан Нямжавын Эрдэнэбаатар нарыг “Тэргүүний уурхайчин” цол тэмдгээр шагнасныг гардууллаа. 
Хөдөлмөрийн аваргуудад хүндэтгэл үзүүлэх ёслолын эхэнд Ил уурхайн дарга Д.Нямдорж “Өнгөрсөн онд уурхайчид бид уулын цул олборлолтын төлөвлөгөөг 99.4 хувиар, хүдэр олборлолтын төлөвлөгөөг 100.3 хувиар биелүүлсэн амжилттай ажиллалаа. Мөн Эмульсийн тэсрэх бодисын үйлдвэр шинээр барьж ашиглалтад оруулж, тоног төхөөрөмжийн механик ажиллагааг бүрэн автоматжуулж, ажлын байрны орчин нөхцөлийг сайжруулсан. Үндсэн тоног төхөөрөмжийн шинэчлэлийн хүрээнд Liebherr R9350 маркийн хоёр экскаватор, СБШ-250МНА маркийн өрмийн нэг машин ажилд гаргасан нь үйлдвэрлэлийн төлөвлөгөөний биелэлтэд эерэг нөлөө үзүүллээ” хэмээн онцлов.