“Үндэсний давхар даатгал” ХК-ийн төлөөлөл мэдээлэл хийв

Эрдэнэт үйлдвэрийн удирдлагууд “Үндэсний давхар даатгал” ХК-ийн төлөөлөгчдийг өнөөдөр хүлээн авч уулзлаа. Уулзалтад Эрдэнэт үйлдвэрийн Санхүү, нягтлан бодох бүртгэлийн хэлтсийн Ерөнхий нягтлан бодогч-хэлтсийн дарга Т.Очирхүү, Хөдөлмөрийн аюулгүй байдал, эрүүл ахуйн хэлтсийн дарга Д.Мөнхболд, Нийгмийн харилцааны хэлтсийн Хамтын ажиллагаа, төслийн албаны дарга Д.Эрдэнэбат, Ажил үйлчилгээ худалдан авах ажиллагааны хэлтсийн дарга Б.Батболд, Зах зээлийн судалгаа, маркетингийн хэлтсийн дарга Д.Дашдорж болон “Үндэсний давхар даатгал” ХК-ийн гүйцэтгэгч захирал Б.Жавхлант, Дотоод аудитор Д.Дуулал, Ерөнхий андеррайтор Д.Мөнхбилэг, Чанарын менежментийн ажилтан Н.Энхзаяа нар оролцлоо. 
“Үндэсний давхар даатгал” ХК-ийн гүйцэтгэгч захирал Б.Жавхлант хийсэн мэдээлэлдээ, “Манай компани анх 2014 онд малын индексжүүлсэн даатгалын тухай хуулийн дагуу үүсгэн байгуулагдсан. Улмаар Гамшгийн эрсдэлийн даатгалын тусгайлсан чиг үүргийг хэрэгжүүлэх Төрийн өмчит хувьцаат компани болон өргөжсөн. 2019 оноос “Үндэсний давхар даатгал” ХК болж, Монгол Улсад үйл ажиллагаа эрхэлж буй тусгай зөвшөөрөлтэй даатгалын компаниудтай хамтран, ердийн давхар даатгалын үйл ажиллагаа явуулж ирлээ. Давхар даатгалын зах зээл дээр хэрэгжиж байгаа хөгжлийн баримт бичгүүдэд тусгагдсан гол зорилтууд “Үндэсний давхар даатгал” компанитай шууд холбоотой хэрэгждэг. Тухайлбал, “Алсын хараа-2050” Монгол Улсын урт хугацааны хөгжлийн баримт бичигт зааснаар үндэсний давхар даатгалын тогтолцоог бий болгон бэхжүүлэх, эрх зүйн орчныг бүрдүүлэх, гамшгийн стандартын тогтолцоог бий болгох гэсэн томоохон хөгжлийн зорилтуудыг тавьсан байдаг. Үүнийг хэрэгжүүлэх Төрийн өмчийн цорын ганц давхар даатгалын компани бол манайх. Манай бүтээгдэхүүний нэг гол зүйл нь малын индексжүүлсэн даатгал байдаг. Өнгөрсөн жил зудын эрсдэлээс хохирсон 22 мянган малчин өрхөд 16,8 тэрбум төгрөгийн нөхөн төлбөр олголоо. 

Эрдэнэт үйлдвэрийн тухайд 2021 оноос хамтын ажиллагааны гэрээтэй ажиллаж байна. Тус үйлдвэр манай улсын төсвийн орлогын зонхилох хувийг бүрдүүлж ирсэн. Манай улсын стратегийн онц ач холбогдол бүхий үйлдвэрийн газар. Монгол Улсын хөгжлийн түүчээ аж ахуйн нэгж. Тэгэхээр Эрдэнэт үйлдвэрийн эрсдэлгүй, тогтвортой байх асуудал бол Монгол Улсын нэн тэргүүнд тавих зорилго байх учиртай. Иймээс “Үндэсний давхар даатгал” ХК давхар даатгалын чиглэлээр эрсдэлийг хуваарилахаас гадна Эрдэнэт үйлдвэрийн үйл ажиллагааны тогтвортой байдал, эрсдэлгүй байхад нь мэргэжлийн зөвлөгөө өгч хамтран ажиллаж байна. Энэ нь Төрийн өмчийн байгууллага, компани хоорондын хамтын ажиллагаа гэхээс илүүтэй, Монгол Улсын Засгийн газар төсвийн орлогын тогтвортой байдалд томоохон хувь нэмэр оруулах хамтын ажиллагааны гэрээ гэж үнэлж дүгнэдэг. 
Монгол Улсын хөгжлийн баримт бичигт, үндэсний давхар даатгалыг бий болгож, эрх зүйн орчныг бүрдүүлнэ гэж заасан. Энэ бодлогын баримт бичигт тавигдсан зорилтуудын хүрээнд Даатгалын тухай хуулийн шинэчилсэн найруулгыг Засгийн газраас УИХ-д өргөн барихаар ажиллаж байна. Дотоодын даатгалын компани заавал давхар даатгалд даатгуулах үүргийн талаар уг хуулийн төсөлд тусгагдсан. Нөгөө талаас Санхүүгийн зохицуулах хороо Монгол Улсад үйл ажиллагаа эрхэлдэг тусгай зөвшөөрөлтэй даатгалын компаниудын заавал биелүүлэх багц дүрэм журмыг батлан хэрэгжүүлж мөрдүүлдэг. Уг багц журмын давхар даатгалын төлөвлөгөөнд тавигдах шаардлагад тусгаснаар дотоодын давхар даатгалын компани тэргүүн ээлжид давхар даатгуулах үүрэгтэй гэж заасан. Энэ нь нэг талаас дотоодын давхар даатгалын тогтолцоог дэмжсэн асуудал юм. Нөгөө талаас асар их хэмжээний эрсдэлийг хуваарилах тогтолцоог илүү боловсронгуй болгох, ялангуяа үндэсний давхар даатгалыг бэхжүүлэхтэй холбоотой хөгжлийн баримт бичигт тавигдсан зорилтуудыг ханган хэрэгжүүлэх нэг том алхам болж байна” гэв.