Удирдах ажилтнуудын шуурхай зөвлөгөөний тойм

Эрдэнэт үйлдвэрийн удирдах ажилтнуудын ээлжит шуурхай зөвлөгөөн өнөөдөр боллоо. Шуурхай зөвлөгөөний эхэнд, ХАБЭА-н хэлтэс төлөвлөсөн 133 ажлаа хэрэгжүүлснээ танилцууллаа. Хамгаалах хувцас, хэрэгсэл хуваарийн дагуу түгээгдэж байгаа бөгөөд өнгөрсөн баасан гарагт Баяжуулах үйлдвэрт хамгаалах хувцас, хэрэгслийн зорилтот хяналт шалгалт хийгдсэн байна. Мөн сөрөг хүчин зүйлсийн 18 хэмжилт хийснээс Засвар, механикийн заводод зөвшөөрөгдөх хэмжээнээс хэтэрсэн үзүүлэлт гарсан тул албан шаардлага хүргүүлжээ. Түүнээс гадна “Эрдэнэт цогцолбор” дээд сургууль дээр 228, ажлын байран дээр 236 ажилтан, гаднын байгууллагын 39, нийт 500 гаруй хүн ХАБЭА-н сургалтад хамрагдсан байна. 
Хоёрдугаар сар гарсаар уулын цул гаргалт +7000 м3, хөрс хуулалт +47000 м3, хүдэр дэх зэсийн агуулга 0,378, молибдены агуулга 0.014, технологийн балансаар зэсийн металл авалт 88.11, молибдены металл авалт 54.82 хувийн гүйцэтгэлтэй байгааг Үйлдвэрлэл, техникийн хэлтсээс мэдээллээ. Энэ хугацаанд 22.36 хувийн агуулгатай 5409 тонн цэвэр зэс агуулсан 24193 тонн зэсийн баяжмал үйлдвэрлэжээ. Харин молибдены баяжмал 92 контейнер гаргасан байна. Зэсийн баяжмал 426 вагон ачсан нь төлөвлөгөөнөөс 12 вагоноор илүү явна. Харин молибдены баяжмал 16 партыг ачжээ. 
Энэ долоо хоногт уулын цул гаргалт 668.1 мянган м3, хөрс хуулалт 376 мянган м3, хүдэр өгөлт 780 мянган тонн, хүдэр боловсруулалт 776 мянган тонн, чанарын үзүүлэлт төлөвлөгөөний дагуу явагдахаар төлөвлөгөөнд тусгасан байна.
Баяжуулах үйлдвэрт шинэ урвалжийн үйлдвэрлэлийн туршилт 2-р сарын 15-наас эхэлжээ. ХАБЭА-н орчин нөхцөлийг сайжруулах, чанарын үзүүлэлтүүдийг нэмэгдүүлэх, дарагч урвалжийн зарцуулалтыг бууруулах, технологийн процессыг хялбаршуулах, цаашлаад тоног төхөөрөмжийн насжилтыг уртасгах, өртөг зардлыг бууруулах үндсэн чиглэлийг барьж туршилтын ажил хийж байгааг М.Отгон дарга танилцуулаа. Энэхүү туршилтын ажилд Үйлдвэрлэл, техникийн хэлтэс, Чанарын хяналтын хэлтэс, Судалгаа, шинжилгээний хүрээлэн, Геологийн төв лаборатори, Монголын ашигт малтмал баяжуулагчдын холбоо зэрэг гадаад, дотоодын байгууллага оролцож, хөндлөнгийн хараат бус дүгнэлт гаргах юм. Туршилтын эхний үр дүн эерэг гарч байна. Эцсийн үр дүн сайн гарвал технологийн шинэчлэл хийх боломжтой гэж урьдчилан танилцуулав. 
Геологи, хайгуулын экспедици өрмийн засвар үйлчилгээний ажлаа дууссан. Техникийн даалгавар бэлэн болбол энэ долоо хоногт өрөмдлөгийн ажлыг эхлүүлэхийг мэдэгдсэн. Харин Барилга, байгууламжийн хяналт төлөвлөлтийн хэлтэс 2026 оны урсгал засвар болон хөрөнгө оруулалтын ажлын жагсаалтыг нэгтгэснийг мэдээлэв. Хөрөнгө оруулалтаар бүтцийн 30 нэгжид 181, урсгал засвараар 199 ажил хийхээр тусгасныг нягтлахаар ажиллаж байна. 
“Эрдэнэт үйлдвэр” ТӨҮГ-ын Луу жилийн “Хөдөлмөрийн аварга”-уудыг алдаршуулах ёслол 02-р сарын 21-ний өдөр Соёл, урлагийн цогцолборт болно. Энэ үеэр, “Эрдэнэс Монгол” нэгдлээс Эрдэнэт үйлдвэрийг шагнасан 100 сая төгрөгийг Ерөнхий захирал Шинэ жилийн баяраар амласнаа хэрэгжүүлж, гадаад аялах азтануудыг тодруулах юм. 
Захиргаа, удирдлага, санхүүгийн газрын дарга Д.Баярбат, Эрдэнэт үйлдвэрийн 2024 оны үйлдвэрлэл, эдийн засаг, аж ахуйн тайлангийн хурал амжилттай болж өндөрлөснийг мэдээллээ. Өмнөх жилүүдийг бодвол комиссын бүх гишүүн ижил түвшинд үнэлгээ өгсөн нь онцлог байсныг дурдаад, шалгуур үзүүлэлт нарийн, үнэлгээ бодитой гарсныг онцоллоо. Өнгөрсөн онд амжилттай ажилласан уурхайчин хамт олондоо баяр хүргэж, ажлын амжилт хүссэн юм.