Ирээдүйн удирдах ажилтнууд манлайлал, авьяас чадвараа ахиулснаа баталгаажууллаа

Эрдэнэт үйлдвэрийн Хүний нөөцийн хөгжлийн цогц хөтөлбөрийн нэг “Манлайлал, авьяас чадварын хөтөлбөр”-ийн тайлангийн үйл ажиллагаа Соёл, урлагийн цогцолборын Их танхимд өнөөдөр боллоо. Ахисан түвшинд гурван жил хэрэгжсэн энэхүү хөтөлбөрийн тайлангийн үйл ажиллагаанд УИХ-ын гишүүн Д.Үүрийнтуяа, УИХ-ын гишүүн С.Эрдэнэбат, Засгийн газрын Хэрэг эрхлэх газрын Салбарын бодлого, зохицуулалтын газрын дарга, “Эрдэнэс Монгол” нэгдлийн ТУЗ-ийн дарга Ш.Мөнхцэрэн, Хүний нөөц, хөгжлийн зөвлөлийн зохицуулагч Ч.Сүнжидмаа, Чанар, бүтээмжийн менежер Д.Ядамжав, УИХ-ын Тамгын газрын дэд дарга, Хойд бүсийн хөгжлийн төвийн Удирдах зөвлөлийн дарга Ү.Амарбат тэргүүтэй хүндэт зочид болон "Эрдэнэт үйлдвэр" ТӨҮГ-ын Ерөнхий захирал Г.Ёндон, Ерөнхий инженер Т.Батмөнх, Үйлдвэрийн газрын дээд шатны удирдлагууд, бүтцийн нэгжийн дарга нар уурхайчин хамт олны төлөөлөл оролцсон юм. 
2022 онд ахисан түвшинд хэрэгжиж эхэлсэн “Манлайлал, авьяас чадварын хөтөлбөр”-т анх, манлайлагч 100 залуу хамрагдсан бол 2023 онд 82, 2024 онд 64 ажилтан идэвх оролцоо, өөрийн хөгжлөөрөө шалгарч үлдсэн байна. Тэд хөтөлбөрийн хугацаанд олон төрлийн сургалт, үйл ажиллагаанд хамрагдаж, Хөтөлбөр хэрэгжүүлэгч Дэд ажлын хэсгээс төлөвлөн даалгасан нөлөөллийн ажил, удирдахуйн ухааны хэлэлцүүлэг, төслийн менежментийн уралдаан зэрэгт багийн зохион байгуулалтаар оролцож, манлайлал, авьяас чадвараа хэрхэн хөгжүүлснээ тайлангийн эхлэлээс төгсгөл хүртлээ мэдрүүлэв. Тэд 37 удаагийн сургалт, хөгжлийн үйл ажиллагаанд хамрагдаж, 15 удаа оношилгоо, үнэлгээ, дүгнэлт хийлгэж, 18 уулзалт хэлэлцүүлэг өрнүүлж, олон нийтийг хамарсан нөлөөллийн 16 ажил санаачлан хэрэгжүүлэн, үйлдвэрт үр ашгаа өгсөн найман төсөл хэрэгжүүлжээ. Энэ үеэр уг хөтөлбөрийн үйл ажиллагааг харуулсан Гэрэл зургийн болон цахим үзэсгэлэн Соёл, урлагийн цогцолборын 2 давхрын фоей-д дэлгэгдсэн байлаа.
Тайлангийн үйл ажиллагааны төгсгөлд "Эрдэнэт үйлдвэр" ТӨҮГ-ын Ерөнхий захирал Г.Ёндон хөтөлбөрийн үр дүнг хэлэхдээ, "47 дахь жилдээ тасралтгүй үйл ажиллагаа явуулж буй Эрдэнэт үйлдвэр дахин 55 жил ажиллах эрдэс баялгийн нөөцөө баталгаажуулсан. Хүний нөөцийн хөгжлийн цогц хөтөлбөрөөр маш чадварлаг хүний нөөцөө бэлдлээ. Ирээдүйд Эрдэнэт үйлдвэрийн бүх шатны удирдлагын багт өнөөдрийн “Манлайлал, авьяас чадварын хөтөлбөр”-ийн оролцогчид ажиллах нь тодорхой. Цаашид ч хүний нөөцийн хөгжлийн цогц хөтөлбөрийн хүрээнд чадварлаг ажилтнуудаа үргэлжлүүлэн бэлтгэх болно" хэмээн онцлоод, манлайлал, авьяас, чадвараа ахисан түвшинд гаргасан залууст баяр хүргэж, амжилт хүслээ. 
“Манлайлал, авьяас чадварын хөтөлбөр”-өөр өөрийгөө хөгжүүлж, таниулж, шалгарч үлдсэн 64 залууд "Батламж" гардуулснаар тайлангийн үйл ажиллагаа өндөрлөлөө.