“Манлайлал, авьяас чадварын хөтөлбөр”-ийн оролцогчид карьер хөгжлийн төлөвлөлтөө амжилттай хэрэгжүүлжээ

Эрдэнэт үйлдвэрт хэрэгжиж буй Хүний нөөцийн хөгжлийн цогц хөтөлбөрийн нэг болох “Манлайлал, авьяас чадварын хөтөлбөр”-ийн оролцогчид хувь хүний хөгжлийн төлөвлөгөөгөө хэрхэн хэрэгжүүлсэн, манлайлах, илтгэх, өөрийн санаа бодлыг итгэл үнэмшилтэйгээр товч, тодорхой илэрхийлэх, даалгаврыг ойлголтын зөрүүгүй өгөх, хамт олноо өөрчлөлт, зорилгын төлөө уриалах, сэтгэл санааг нь эерэг байлгах, урам өгөх, хүчтэй байх зэрэг удирдах ур чадварт хэрхэн суралцсанаа тайлагнаж байна. 
Ахисан түвшинд гурав дахь жилдээ хэрэгжиж буй уг хөтөлбөрт анх, манлайлагч 100 залуу хамрагдаж байсан бол, 2023 онд 82, 2024 онд 64 ажилтан шалгарч үлджээ. Оролцогчдыг идэвх оролцоо, өөрийгөө хөгжүүлсэн байдалд үнэлгээ өгч чанаржуулдаг гэж уг хөтөлбөрийг хэрэгжүүлэх Дэд ажлын хэсгийн ахлагч, Засвар, угсралтын цехийн Ерөнхий инженер Т.Атарбаяр ярилаа. 
Өнгөрсөн гурван жилийн хугацаанд “Манлайлал, авьяас чадварын хөтөлбөр”-ийн оролцогчдоос 13 ажилтан эрдэм шинжилгээний ажил, илтгэлийн уралдаанд шалгарч, 17 ажилтан карьер хөгжлийн төлөвлөлтөө амжилттай хэрэгжүүлэн, дэвшин ажиллаж, мэргэжлийн зэргээ ахиулжээ.