Ажилчид цаг бүртгэлийн TIMEMASTER систем ашиглаж эхэллээ

Эрдэнэт үйлдвэрийн 7000 гаруй уурхайчдын 4000 орчим нь ажлын үнэмлэхээр цагаа бүртгүүлэх автомат төхөөрөмжгүй газар ажилладаг. Бүтцийн зарим нэгжүүдэд хурууны хээ, царай таних зэрэг хүний биометрик мэдээлэл ашиглан ажлын цагийн бүртгэл явуулдаг байсан боловч энэ нь УИХ-аар 2021 оны 12 дугаар сарын 17-ны өдөр батлагдсан “Хүний хувийн мэдээлэл хамгаалах тухай” хуулиар хориглогдсон тул цаашид өөр хэлбэрээр цагийн бүртгэл явуулах хэрэгцээ шаардлага үүссэн юм. Хүний нөөц, захиргааны хэлтсээс Мэдээллийн технологийн хэлтэст хүсэлт тавьсаны дагуу тус цехийн инженерүүд Холбоо, мэдээллийн технологи, автоматжуулалтын цехийн мэргэжилтнүүдтэй хамтран “Timemaster” системийг дотоод нөөц бололцоогоороо хөгжүүлж, үйлдвэрт нэвтрүүлээд байна. Одоогоор Эрдэнэт үйлдвэрийн цагийн бүртгэлийн турникет төхөөрөмжгүй, Ерөнхий захиргааны III байр, Баяжуулах үйлдвэрийн  Шүүн хатаах хэсэг, Өөрөө нунтаглах хэсэг, Хаягдлын аж ахуй, Ус хангамжийн цех, Цахилгааны цех, Автотээврийн цехийн Тусгай зориулалтын машин механизмын засварын хэсэг, Төрөл бүрийн авто машины засварын газар, “Ногоон хөгжил” төслийн нэгж, Спорт цогцолбор, Соёл, урлагийн цогцолбор, Барилга засварын цех, Тээвэр, ложистикийн төв, Судалгаа, шинжилгээний хүрээлэнгийн химийн төв лаборатори, "эрдэнэт” сувиллын цогцолбор, Ил уурхайн Эмульсийн тэсрэх бодисын үйлдвэр зэрэг 32 нэгжийн ажилчид хэрэглэгчээр оржээ. 
Ажилчид “Timemaster” гэсэн нэртэй утасгүй сүлжээнд нэвтрэн Digital EMC цахим аппликейшн ашиглан өөрийн цагийг бүртгүүлэх бөгөөд бусдын гар утсыг ашиглан өөрийн эрхээр нэвтэрч цагаа бүртгүүлэх боломжгүй юм.
Мэдээллийн технологийн хэлтэс, Холбоо, мэдээллийн технологи, автоматжуулалтын цехийн мэргэжилтнүүд хамтран цагийн бүртгэлийн энэхүү цахим системийг өөрсдийн хүчээр хөгжүүлж, нэвтрүүлснээр үйлдвэрт 330 орчим сая төгрөгийн хэмнэлт гаргажээ.