Баяжуулах үйлдвэрийн үйл ажиллагааны тайлангийн хурал боллоо

Баяжуулах үйлдвэрийн тайлангийн хурал өчигдөр болж, 14 хэсгийн 800 гаруй ажилтан оролцлоо. Энэ үеэр цехийн удирдлагууд үйлдвэрлэлийн үйл ажиллагааны талаар дэлгэрэнгүй мэдээлэл хийв. Мөн Хөдөлмөрийн аюулгүй байдал,эрүүл ахуй, Хүний нөөц, Төлөвлөлт шинжилгээний товчооны мэргэжилтнүүд өөрсдийн хариуцсан чиглэлээр мэдээлэл өгч, ажилчдын сонирхсон асуултад хариуллаа. Түүнчлэн ажилтнуудын санал хүсэлт, шүүмжлэлийг сонсож, цахимаар санал асуулга авчээ. Өнгөрсөн онд нийт 13 багц, 17 төрлийн төлөвлөгөөт ажлыг 96 хувийн гүйцэтгэлтэй хийсэн байна. Баяжуулах үйлдвэрийн Хүний нөөцийн товчоон дарга Т.Тунгалагтамиртай уулзахад: “Манай хамт олон үйл ажиллагааныхаа мэдээллийг жил бүр ажилтнууддаа хүргэдэг. Тухайн жилд ажилтнуудаас гаргасан санал хүсэлтийн дагуу ажлын төлөвлөгөө гаргаж ажилладаг. Бид ажилтан бүрт хүрч ажиллах зорилго тавьж байгаа. Жил бүрийн тайлангийн хурал өөр өөрийн онцлогтой. Өнгөрсөн жил хэсэг тус бүр дээр нь очиж хурлаа хийсэн. Энэ онд ерөнхий захиргааны нэгдүгээр байрны зургаан давхарт болон цехийнхээ мэдээлэл хөгжлийн танхимд хуваарийн дагуу хурлын үйл ажиллагааг зохион байгууллаа. Мөн зарим нэг алслагдмал хэсэг дээрээ очиж ажилласан. Одоогийн байдлаар Баяжуулах үйлдвэрийн нийт ажилтнуудын 60 гаруй хувь нь 10 орчим жил ажиллаж буй 40 хүртэлх насны залуус байгаа. Ажлын дадлага туршлага харьцангуй багатай ажилчид гэсэн үг. Тэгэхээр ажилчдын дунд явуулсан судалгаа, санал асуулгын үр дүнгээс хамаарч тухайн онд хэрэгжүүлэх уриаг дэвшүүлдэг. Үүнтэй уялдуулан”Мэдлэг чадвар зөв дадал амжилтын үндэс” уриан дор ажиллана. Иймээс залуу ажилтнуудын мэдлэг, ур чадварыг дээшлүүлэх, нөгөө талаар олон жил ажилласан хүмүүс ажлын дадлага туршлагаа өвлүүлэхэд нь анхаарал тавина. Өнгөрсөн онд манай цехийн тухайд сахилгын зөрчил буурсан ч ХАБЭА-н зөрчил өссөн үзүүлэлттэй гарсан. Үүнийг судлахаар ажил, амьдралын буруу арга барилаас үүдэлтэй байдаг. Өөрөөр хэлбэл ажлын буруу дадал хэвшил, ХАБ-ын зориулалттай хувцас, хэрэгслээ зөв зохистай ашиглаагүйгээс үүдэлтэй зөрчил дутагдал гарсан байх жишээтэй. Ийм хүчин зүйлээс шалтгаалан залуу ажилчдыг зөв дадал хэвшилд сургах нь ямар нэгэн зөрчил дутагдал гаргах эрсдэлээс урьдчилан сэргийлснээр амжилтад хүрнэ” гэв.