Уулын технологийн тээврийн төлөвлөгөө давж биелэх болжээ

Өнгөрсөн оны сүүлчээр Эрдэнэт үйлдвэрийн Авто тээврийн цехийн Уулын технологийн тээврийн хэсэг Япон улсад үйлдвэрлэгдсэн “Комацу HD 1500-8” загварын 142 тонны даацтай, өөрөө буулгагч 10 автомашинаар парк шинэчлэл хийсэн нь уулын цул, хөрс тээврийн төлөвлөгөөгөө давж биелүүлэх нөхцөлийг бүрдүүлжээ. 2024 оны эхнээс хоцрогдолтой явсан төлөвлөгөөг нөхөж, Баяжуулах үйлдвэрт өгөх балансын хүдрийн эрчимжүүлсэн төлөвлөгөөг хангасан байна. Ингэснээр өнгөрсөн оны 12-р сард уулын цул тээвэрлэлтийн төлөвлөгөөг 120.9 хувиар, ачаа эргэлтийн төлөвлөгөөг 117 хувиар биелүүлсэн амжилттай ажиллалаа. Өөрөөр хэлбэл, 2024 оны IV улиралд 801,2 мянган м3 уулын цул, 6.302 мян.тн/км ачаа эргэлт илүү гүйцэтгэсэн байна.
“Оны эхний 15 хоногийн байдлаар Авто тээврийн цехийн Уулын технологийн тээврийн хэсэг уулын цул тээвэрлэлтийн төлөвлөгөөг 116.36 хувиар, үүнээс хөрс тээвэрлэлтийн төлөвлөгөөг 119.7 хувиар биелүүлээд байна. “Комацу” өрөө буулгагч автомашин ашиглалтад орсноор уулын цул тээвэрлэлтийн бүтээмж 7.6 хувиар дээшлэх, дизелийн түлш зарцуулалт 8.2 хувиар буурах, нэгж тн/км-ийн өртөг багасах боломж харагдаж байна” гэж Авто тээврийн цехийн Уулын технологийн тээврийн хэсгийн дарга Д.Болор-Эрдэнэ ярилаа. 
Энэ онд Монгол Улсад авто тээврийн салбар үүсэж хөгжсөний 100 жилийн ой тохиож байгаатай холбогдуулан Уулын технологийн тээврийн хэсгийнхэн ажилчдынхаа ар гэрийнхнийг уурхайн зориулалттай хүнд даацын өөрөө буулгагч автомашины операторын ажлын байртай танилцуулах, мөн шинэ залуу жолооч нарын дунд ажил мэргэжлийн уралдаан зохион байгуулахаар төлөвлөжээ.