“Эрдэнэт цогцолбор” дээд сургуулийн 26 дахь төгсөлтийн “Эрдмийн баяр” боллоо

ШУТИС-ийн харьяа, Ш.Отгонбилэгийн нэрэмжит “Эрдэнэт цогцолбор” дээд сургуулийн 2024-2025 оны хичээлийн жилийн намрын улирлын 26 дахь төгсөлтийн “Эрдмийн баяр” өнөөдөр боллоо. 
“Эрдмийн баяр”-ын хүндэтгэл ёслолын ажиллагаанд “Эрдэнэт үйлдвэр” ТӨҮГ-ын Ерөнхий инженер, “Эрдэнэт цогцолбор” дээд сургуулийн Удирдах зөвлөлийн дарга, Доктор Т.Батмөнх, Стратеги, хөгжлийн газрын дарга П.Энхбат, Хүний нөөц, захиргааны хэлтсийн дарга, Доктор О.Отгонбаяр, Ил уурхайн дарга, Доктор, дэд профессор, ШУТИС-ийн Хүндэт профессор Д.Нямдорж, Төрийн соёрхолт, Шинжлэх ухааны доктор Ж.Баатархүү, “Эрдэнэт цогцолбор” дээд сургуулийн захирал, Доктор Д.Зоригтхүү, ШУТИС-ийн Бизнесийн ахисан түвшний сургуулийн Сургалт чанарын албаны дарга М.Банзрагч болон тус сургуулийн эрдэмтэн багш нар, ШУТИС-ийн Хүндэт профессорууд, оюутан сурагчид, эцэг эхчүүдийн төлөөлөл оролцлоо. 
“2024-2025 оны хичээлийн жилийн намрын улиралд бакалаврын сургалтын хоёр хөтөлбөрийг магадлан итгэмжлүүлэхэд хичээл зүтгэлээ шингээн ажилласан сургуулийн нийт хамт олон, дэмжин хамтран ажилласан Эрдэнэт үйлдвэрийн удирдлага, цех нэгжийн хамт олонд чин сэтгэлийн талархал илэрхийлье” хэмээн тус сургуулийн Захирал, Доктор Д.Зоригтхүү нээлтийн үгэндээ онцолж, өнөөдрийн байдлаар “Эрдэнэт цогцолбор” дээд сургуулийн бакалаврын сургалтын таван хөтөлбөр үндэсний хэмжээнд магадлан итгэмжлэгдсэнийг бахархалтайгаар тэмдэглэв. 
“Эрдэнэт цогцолбор” дээд сургуулийн энэ хичээлийн жилийн намрын улирлын 26 дахь төгсөлтөөр Уул уурхайн мэргэжил эзэмшин, инженерийн эгнээнд элсэн орж буй төгсөгчдөд “Эрдэнэт үйлдвэр” ТӨҮГ-ын Ерөнхий инженер Т.Батмөнх баяр хүргэн, эх орны хөгжил дэвшилд эрдэм мэдлэг, хүч хөдөлмөрөө зориулан ажиллах үйлсэд нь өндөр амжилт хүссэн юм. 
Энэ удаагийн намрын төгсөлтөөр “Эрдэнэт цогцолбор” дээд сургуулийн бакалавр, магистрын сургалтын хөтөлбөрөөр нийт 60 оюутан төгсөж, ШУТИС болон МУИС-ийн бакалаврын 32, магистрын 28 төгсөгч мэргэжлийн диплом, энгэрийн тэмдгээ гардан авлаа. Энэ үеэр ШУТИС-ийн Цахилгаан системийн автоматжуулалтын ангийг 3.01 үнэлгээний голч дүнтэй төгсөгч Ц.Нарангэрэл сэтгэгдлээ хуваалцаж, эрдэмтэн багш нар, ангийн нөхөд болон сургуулиа амжилттай төгсөхөд нь тусалж дэмжсэн гэр бүлийнхэндээ баярласнаа илэрхийлсэн юм. 
“Эрдмийн баяр”-ын хүндэтгэл, ёслолын ажиллагаанд Соёл, урлагийн цогцолборын уран бүтээлчид ая дуугаа өргөсөн бол оюутан А.Мөнхзул, Н.Билгүүн нар “Эрдэнэт цогцолбор” дээд сургуулийн сүлд дууг хүндэт зочдодоо зориулан дуулж, хүндэтгэл үзүүлэв.