Удирдах ажилтнуудын шуурхай зөвлөгөөний тойм

Эрдэнэт үйлдвэрийн Засвар механикийн заводын даргаар Т.Ариунсан томилогдон, ажилдаа орлоо. Монгол Улсын Зөвлөх инженер тэрээр 1993-2016 онд Засвар механикийн заводад жонш үйлдвэрлэгч, мастер, хэсгийн дарга, ерөнхий механик, заводын дарга, 2016-2019 онд Техникийн хэлтэст механикч, 2019-2020 онд  Бараа материал худалдан авах ажиллагааны хэлтсийн орлогч дарга, 2020-2022 онд Ажил, үйлчилгээ худалдан авах ажиллагааны хэлтсийн дарга, 2022-2025 онд үйлдвэрийн Хөрөнгө оруулалт, худалдан авах ажиллагааны бодлогын газрын Төлөвлөлт, мониторингийн албаны даргаар тус тус ажилласан юм. 

Өнгөрсөн долоо хоногт Хөдөлмөрийн аюулгүй байдал, эрүүл ахуйн чиглэлд хийсэн ажлын тайланг хэлтсийн Албаны дарга Б.Баттайван мэдээллээ. Энэ хугацаанд 31 өндөр эрсдэлтэй ажил хийж гүйцэтгэхэд хяналт тавьж ажиллажээ. Мөн Хөдөлмөрийн аюулгүй байдал, эрүүл ахуйн  зөвлөл хуралдаж, аюулгүй ажиллагааны зөрчил гаргасан Авто тээврийн цехийн нэр бүхий ажилтнуудад холбогдох хариуцлага тооцохоор шийдвэрлэсэн байна. Хөдөлмөрийн аюулгүй байдлын багшийн заах арга зүй сургалтад үйлдвэрийн бүтцийн нэгжийн 70 гаруй ХАБЭА-н ажилтнууд хамрагджээ. ХАБЭА-н хэлтсийн мэдээллийн дараа Ерөнхий инженер Т.Батмөнх, үйлдвэрийн хэмжээнд хөдөлмөрийн аюулгүй байдал, эрүүл ахуйн чиглэлийн хяналт шалгалтыг эрчимжүүлж, хөдөлмөрийн сахилга батыг дээшлүүлэх, аюулгүй ажиллагааны цогц арга хэмжээ авч хэрэгжүүлэх, хянаж ажиллахыг бүтцийн нэгжийн бүх удирдлагуудад онцгойлон үүрэг болголоо. 
Байгаль орчин, ногоон хөгжлийн хэлтсээс “Цагаан тоосны дэгдэлт, сөрөг нөлөөллийг бууруулах” дэд хөтөлбөрийн 2024 оны хэрэгжилтийн тайланг Орхон аймгийн Байгаль орчны газарт хүргүүлсэн байна. 2025 оны Байгаль орчны менежментийн төлөвлөгөөг боловсруулан, Байгаль орчин, уур амьсгалын өөрчлөлтийн яамаар батлуулахаар ажиллаж буйг тус хэлтсээс мэдээлэв.  
Баяжуулах үйлдвэрт шинээр суурилуулж буй 3-р секцийн туршилтын хугацаанд гарсан шаардлагатай сайжруулалт, засвар үйлчилгээг үргэлжлүүлэн хийж байгааг цехийн Ерөнхий инженер мэдээлэлдээ дурьдлаа. Энэ долоо хоногт туршилт тохируулгын ажлыг дуусган залгах бөгөөд ирэх долоо хоногт 2-р секцийн засвар угсралтыг эхлүүлэхээр төлөвлөж байгаа бол Засвар механикийн заводын үйлдвэрлэлийн үйл ажиллагаа хэвийн үргэлжилж, Цутгуурын цехийн өргөтгөлийг ирэх 6 дугаар сард ашиглалтад оруулахаар ажиллаж байгаа аж. 
Механикийн хэлтсээс үйлдвэрийн хэмжээнд залуу мастер механик, бригадын дарга нарт гурван чиглэлээр сургалт зохион байгуулахаар төлөвлөжээ. Үйлдвэрлэлд ашиглаж  буй бараа материал, үндсэн техникийн мэдээллийг боловсруулах, тодруулах, засвар үйлчилгээний явцад тухайн сэлбэг материал, эд анги, тоног төхөөрөмж багаж хэрэгслийг зөв ашиглах, аюулгүй ажиллагааг мөрдөх зэрэг мэргэжлийн нарийн мэдээлэл, зааварчилгаа бүхий сургалтад хамруулах юм байна. 
Монгол Улсын Засгийн газрын үйл ажиллагааны бодлогод тусгагдсан “Эрдэнэт машин үйлдвэрлэлийн цогцолбор” байгуулах хөтөлбөрийн төлөвлөгөөг Зам тээврийн яам болон Худалдаа, аж үйлдвэрийн танихимтай хамтран гаргасан байна. Энэ хүрээнд Эрдэнэт хотод форум зохион байгуулж, “Машин үйлдвэрлэлийн цогцолбор”-ыг тойрсон асуудлаар хэлэлцүүлэг хийх ажээ. Энэ үеэр машин үйлдвэрлэлийн чиглэлийн сургалт, үйлдвэрлэл эрхэлж буй аж ахуйн нэгж, компаниудын танилцуулга, туршлагыг харуулсан үзэсгэлэн зохион байгуулна. Үзэсгэлэнд Эрдэнэт үйлдвэрийн ЗМЗ, Ган бөөрөнцгийн цех, Баяжуулах үйлдвэрийн бигнүүрийн хэсэг, АТЦ-ийн дугуй засвар, Ус хангамжийн цехийн ацетилин үйлдвэрлэлийн хэсэг зэрэг бүтцийн нэгжүүд оролцохоор бэлтгэл хангаж буйг Механикийн хэлтсийн дарга Б.Чинзориг мэдээллээ.