Зэсийн баяжмал боловсруулах үйлдвэрлэлээр БНХАУ-даа тэргүүлэгч “Jiangxi Copper” компанийн Стратегийн хөрөнгө оруулалтын хэлтсийн дэд ерөнхийлөгч бөгөөд ерөнхий менежер Zha Kebing, Ерөнхий инженерийн орлогч Peng Cuocheng тэргүүтэй төлөөлөгчид, түнш байгууллагынхаа мэргэжилтнүүдийн хамт “Эрдэнэт үйлдвэр” ТӨҮГ-т зочилж, Ерөнхий инженер Т.Батмөнх, Гадаад харилцаа, экспортын хэлтсийн дарга Я.Пүрвээ, Үйлдвэрлэл, технологийн парк төслийн нэгжийн дарга Б.Алтангэрэл нартай албан уулзалт хийв.
Эрдэнэт үйлдвэрийн Ерөнхий инженер Т.Батмөнх үйлдвэрлэлийн өнөөгийн байдал, хөгжлийн хэтийн төлөвийн талаар зочдод танилцуулж, Эрдэнэтийн ирээдүйн баталгаа болсон Зэсийн баяжмал хайлуулах, боловсруулах үйлдвэрийн төслийн тухай дэлгэрэнгүй мэдээллийг Үйлдвэрлэл, технологийн парк төслийн нэгжийн дарга Б.Алтангэрэл өглөө.
46 дахь жилдээ үйл ажиллагаа явуулж буй Эрдэнэт үйлдвэр цаашид 55 жил ажиллах нөөцөө баталгаажуулсан төдийгүй Зэсийн баяжмал хайлуулах, боловсруулах үйлдвэр байгуулж, нэмүү өртөг шингэсэн эцсийн бүтээгдэхүүн үйлдвэрлэн, өрсөлдөх чадвараа нэмэгдүүлэхээр зорьж байна. Одоогийн байдлаар Засгийн газрын дэмжлэгтэй, хууль, эрх зүйн орчин бүрдсэн, байршил, оновчтой технологио сонгосон, дэд бүтцээ шийдвэрлэсэн, Үйлдвэрлэл, технологийн парк барьж байгуулах ажил эрчимтэй өрнөж байгааг танилцууллаа.
Эрдэнэт үйлдвэр жилд 550-600 мянган тонн зэсийн баяжмал гаргаж, түүнийгээ 100 хувь боловсруулан, 125 мянган тонн цэвэр зэс үйлдвэрлэх зорилготой. Энэхүү төслийг хэрэгжүүлэхэд 762 сая ам.долларын хөрөнгө оруулалт шаардлагатай юм.
“Jiangxi Copper” компанийн төлөөлөгчид Эрдэнэт үйлдвэртэй зэсийн баяжмал боловсруулах чиглэлд хамтрах сонирхлоо энэ үеэр илэрхийлэв. Зочид энэ өдөр Эрдэнэт үйлдвэрийн Ил уурхай, Баяжуулах үйлдвэр, Үйлдвэрлэл, технологийн парк төслийн нэгжийн үйл ажиллагаатай танилцлаа.
Нар минутад мандаж минутад жаргана.
Үс засуулвал: 
Суудал: 
