Цутгуурын цехийн өргөтгөлийн ажил 90 орчим хувийн гүйцэтгэлтэй явна

Эрдэнэт үйлдвэрийг 2031 он хүртэл хугацаад хөгжүүлэх үндсэн чиглэл, Төв болон баруун бүсийн уул уурхай, аж үйлдвэрийн бусад салбарын импорт орлох металл бүтээгдэхүүний зарим хэрэгцээг хангах зорилтын хүрээнд Засвар, механикийн завод цутгамал бүтээгдэхүүн, механик боловсруулалттай эд анги, барилгын болон үйлдвэрлэлийн зориулалттай ган хийц, стандартын бус тоног төхөөрөмж, резинэн эдлэл, элэгдсэн эд ангийг сэргээн засварлах үйлдвэрлэлд түшиглэсэн уул уурхай, хүнд үйлдвэр, хөдөө аж ахуйн машин механизм, тоног төхөөрөмжийн сэлбэг хэрэгслийн үйлдвэрлэлийг хөгжүүлэх чиглэл баримтлан ажиллаж байна. 
Энэ хүрээнд заводын хүчин чадлыг хоёр дахин нэмэгдүүлэх буюу Цутгуурын цехийн жилд 5200 тонн бүтээгдэхүүн үйлдвэрлэх өнөөгийн хүчин чадлыг 7000 тоннд хүргэх, Механик цехийн жилд 3355 тонн бүтээгдэхүүн үйлдвэрлэх хүчин чадлыг 5920 тонн болгон нэмэгдүүлэх, мөн шинэ техник технологи нэвтрүүлсэн, жилд 7000 тонн хром-молибдент ган бүтээгдэхүүн үйлдвэрлэх хүчин чадалтай шинэ Цутгуурын цех байгуулах төсөл хэрэгжиж байна. Цутгуурын цехийн Илчийн боловсруулалтын тасгийн өргөтгөл шинэчлэлийн ажлын Ерөнхий гүйцэтгэгчээр “Аглут” ХХК шалгаран ажиллаж байгаа бөгөөд одоогийн байдлаар барилгын ган хийцлэл, гадна засал, дээвэр, хана, вандан краны зам, гадна дулааны шугам угсралт бүрэн дууссан, хаалга, цонх, халаалт, унд ахуйн ус болон техникийн ус, ариутгах татуурга, тоног төхөөрөмжийн суурийн ажил дуусах шатандаа, шал, дотор засал, хэрэгцээний халуун ус, эргэлтийн ус, цахилгаан хангамжийн ажил үргэлжилж байна. 2022-2024 онд Илчийн боловсруулалтын тасгийн өргөтгөлд Эрдэнэт үйлдвэр нийт 24,196 тэрбум төгрөгийн санхүүжилт хийжээ. 
Харин Механик цехийн өргөтгөлийн зураг төслийг Зураг төслийн хүрээлэн боловсруулж, гүйцэтгэгчийг сонгон шалгаруулах тендер энэ сарын 06-ны өдөр дахин нээгдээд байна.