“Эрдэнэт цогцолбор” дээд сургуулиас зохион байгуулдаг Эрдэнэт үйлдвэрийн ХАБЭА-н энэ жилийн сургалт сургагч багш нарын заах арга зүйн сургалтаар өнөөдөр эхэллээ. Үйлдвэрийн газрын хэмжээнд ХАБЭА-н 100 орчим сургагч багш байдаг бөгөөд энэ удаагийн сургалтад хөтөлбөрийн удирдагч, багийн ахлагч 70 орчим багш хамрагдаж, насанд хүрэгчдэд хичээл заах онцлог, тэдний хүсэлт, хүлээлт, ХАБЭА-н удирдлагын тогтолцооны MNS ISO 45001:2018 стандартын дагуу мэдлэг, чадвар, хандлага гурвын нийлбэр болох чадамжийг хэрхэн олгох, Чадамжид суурилсан сургалтын хөтөлбөрийг үр дүнтэй хэрхэн хэрэгжүүлэх талаар номын дуу сонслоо.
“Эрдэнэт цогцолбор” дээд сургуулийн эрдэмтэн докторууд ХАБЭА-н сургалт үр дүнтэй явагдах тулгын гурван чулуу нь сайн хөтөлбөр, багшийн хөгжил, заах арга, орчин бүрдүүлэлт хэмээн онцолсон. Тиймээс мэргэшсэн, туршлагатай ажилчдыг заах арга зүйгээр дэмжих, хэрэгцээнд суурилсан хичээл сургалтын хөтөлбөр баталгаажуулах, ажилчдын чадамжийг үнэлэх, виртуал орчинд сургалт явуулах зэрэг ХАБЭА-н сургалтуудыг шинэ шатанд гаргах зорилт дэвшүүлэн ажиллаж байгааг “Эрдэнэт цогцолбор” дээд сургуулийн сургалтын мэргэжилтэн П.Мөнхтуяа ярилаа.
Мөн тэрээр, Эрдэнэт үйлдвэрийн ажилчдын дийлэнх хувийг залуус эзэлж буй энэ үед залуу ажилчдыг сургагч багшаар бэлтгэж, шинэ үеийнхний онцлог сэтгэхүй, хэрэгцээ шаардлагад нийцсэн сургалт явуулах боломжийг бүрдүүлэн ажиллахыг зорьж байгааг хэлсэн.
2025 онд тус сургууль нийт ажилтны ХАБЭА-н сургалтаас эхлээд эрсдэлтэй ажлын байрны, шинэ ажилтны, ажил олгогч нарын, дотоод аудитын зэрэг 12 төрлийн сургалтаар 11000 хүн сургахаар төлөвлөжээ. Энэ жил ХЭМАБ-ын манлайллын сургалт шинээр нэмэгдэж байгаагаараа онцлог юм.
Нар минутад мандаж минутад жаргана.
Үс засуулвал: 
Суудал: 
