“Санхүүгийн залилан луйвар” сэдэвт сургалт боллоо

Эрдэнэт үйлдвэрийн ажилчдыг цахим гэмт хэрэгт өртөхөөс урьдчилан сэргийлэх зорилгоор “Санхүүгийн залилан луйвар” сэдэвт сургалт өнөөдөр Ерөнхий захиргааны 2-р байрны “Оюу” танхимд боллоо. УИХ-ын Тамгын газар, Монгол банкны Олон нийт, санхүүгийн боловсролын төвтэй хамтран зохион байгуулсан энэхүү сургалтад үйлдвэрийн газрын 250 гаруй ажилтан хамрагдлаа. 
Монгол банкны Олон нийтийн санхүүгийн боловсролын төвийн мэргэжилтэн, сургагч багш Э.Хүслэнгээс сургалтын талаар тодруулахад: “Сүүлийн үед иргэд телеграмм залилангаар маш их хохирч байна. Ийм залилангийн хор нөлөөг иргэдэд таниулан сурталчлахад өнөөдрийн сургалтын ач холбогдол оршиж байна. Өөрөөр хэлбэл, яг юу яваад байгаа юм. Үүнээс хэрхэн урьдчилан сэргийлэх талаар үйлдвэрийн ажилчдад “Санхүүгийн залилан луйвар” сэдвээр лекц уншлаа. Ямар хэлбэрийн санхүүгийн луйвар явж байгаа. Ямар хэлбэрийн аргууд байгаа юм. Яавал санхүүгийн залилан луйварт өртөхгүй байх талаар мэдээлэл хийлээ. 
Тэгэхээр хувь хүмүүс өөрсдийн мэдээллийн аюулгүй байдлыг ханган ажиллах ёстой. Мэдээллээ бусдад алдаж болохгүй. Өөрсдийн мэдээллээ фэйсбүүк хаяг руугаа оруулдаг. Банкныхаа пин кодыг хүмүүст алддаг. Энэ дундаас залилангийн сэдэлтэй хүмүүс залилан үйлддэг. Тухайлбал, фэйсбүүк дээр тоглоом, хонжворууд гарч ирдэг. Та ирэх жил ямар байх вэ, гэдэг ч юм уу. Аль эсвэл энэ дээр дар, та азтан боллоо... гэдэг чюм уу. Эдгээр линкүүдэд дарснаар хувь хүн өөрийн мэдээллээ алдана гэсэн үг. Энэ бүхнээс болгоомжлох хэрэгтэй” гэв.