“Авлигын эсрэг нэгдье” сургалт боллоо

 Монгол Улс Нэгдсэн үндэстний байгууллагын “Авлигын эсрэг конвенц”-д 2005 оны 12-р сарын 09-ний өдөр элссэн түүхтэй. Энэхүү өдрийг тохиолдуулан Авлигатай тэмцэх газраас нийслэл, дүүрэг, аймаг, сумдын Иргэдийн төлөөлөгчдийн хуралд шинээр томилогдсон төлөөлөгчдөд зориулсан сургалт, соён гэгээрүүлэх ажлыг зохион байгуулж байна. Энэ ажлын хүрээнд “Авлигын эсрэг нэгдье” уриан дор хоёр өдрийн сургалт хийлээ.
Сургалтад Орхон аймгийн Иргэдийн Төлөөлөгчдийн Хурлын төлөөлөгчид болон Нийтийн удирдах 130 гаруй албан тушаалтан оролцов. 
Авлигатай тэмцэх газрын Урьдчилан сэргийлэх соён гэгээрүүлэх хэлтсийн дарга, эрхэлсэн комиссар Х.Ихмөрөн: “Нэгдсэн Үндэстний байгууллагаас жил бүр уриалга гаргадаг. 20 жилийнхээ ойг тохиолдуулан “Авилгын эсрэг дэлхий нийтээрээ нэгдэе” гэсэн уриа гаргаж байсан. Манай байгууллага өнгөрсөн жилээс ”Авлигын эсрэг нэгдье” гэсэн соён гэгээрүүлэх аяныг улс орон даяар зохион байгуулж байна. Харин “Шударга ёс хөгжил дэвшилд” гэдэг нь манай Авлигатай тэмцэх газрын үндсэн уриа юм. 21 аймаг, нийслэлийн нийтийн албан тушаалтнуудад зориулсан “Авлигын гэмт хэргээс хэрхэн урдчилан сэргийлэх” талаар сургалт зохион байгуулж байна. 2023-2030 онд хэрэгжих “Авлигатай тэмцэх үндэсний хөтөлбөр” шинээр батлагдсан. Энэ үндэсний хөтөлбөрт тусгагдсан зорилгууд болон хэрэгжих төлөвлөлтийн ямар асуудал дээр анхаарах, авлигын гэмт хэргийг хэрхэн бууруулах талаар сургалт мэдээ, мэдээлэл өгч байгаагаараа онцлог юм. Манай АТГ олон нийтэд болон нийтийн албан тушаалтнуудад авлигын эсрэг хор хөнөөлийн талаар мэдээлэл түгээх, танин мэдүүлэх үүргийг хуулиар хүлээдэг. Цаашид бид Авлигын эсрэг төлөвлөгөөнд заагдсан арга хэмжээний хүрээнд хууль тогтоомжуудын хэрэгжилт, авлигын эсрэг бодлогын баримт бичгийн шинэчилсэн найруулга, өөрчлөлтүүдийн талаарх сургалтуудыг шат дараатай зохион байгуулахаар төлөвлөөд байна” гэв.