Монголын Туялзуур сэлэмний холбооноос жил бүр уламжлал болгон зохион байгуулдаг 8-16 насны ангиллын Өсвөр үе, багачуудын Улсын аварга шалгаруулах тэмцээн энэ сарын 23, 24-ний өдрүүдэд Улаанбаатар хотноо болж, Эрдэнэт үйлдвэрийн “Хангарди” спорт клубын тамирчин хүүхдүүд хоёр алт, хоёр мөнгөн медаль хүртэж тун амжилттай оролцлоо.
2018 оноос эхлэн зохион байгуулагдсан Туялзуур сэлэмний Улсын аварга шалгаруулах тэмцээнд энэ удаа зургаан клубын, давхардсан тоогоор 250 гаруй хүүхэд хоёр өдрийн турш тулааны зам дээр авхаалж самбаа, техник ур чадвар, оюун сэтгэлгээний хурдаа сорин өрсөлдсөн юм. Тэмцээний U-8 насны ангилалд Эрдэнэт үйлдвэрийн “Хангарди” спорт клубын тамирчин, Орхон аймгийн 4-р сургуулийн 3г ангийн суралцагч Мөнхжаргалын Гоодарь, U-12 насны ангилалд мөн “Хангарди” спорт клубын тамирчин, 8-р сургуулийн 7а ангийн суралцагч Мөнх-Оргилын Түвшинбаяр нар алтан медаль хүртэж, Улсын аварга болов. Харин Орхон аймгийн V сургуулийн 4е ангийн суралцагч Эрдэнэбатын Амин U-12 насны ангилалд, 11б ангийн суралцагч Хярсбаярын Нандин-Эрдэнэ U-16 насны ангилалд мөнгөн медаль хүртэж, “Хангарди” спорт клубынхээ нэрийг улсад гаргалаа.
Жил ирэх тусам Туялзуур сэлэмний Улсын аварга шалгаруулах тэмцээний цар хүрээ, хүүхдүүдийн ур чадвар нэмэгдэж байгааг Монголын Туялзуур сэлэмний холбооны Ерөнхий нарийн бичгийн дарга, Азийн Туялзуур сэлэмний холбооны Удирдах зөвлөлийн гишүүн Д.Ганбаатар онцолсон.
Туялзуур сэлэм бол анхны олимпоос эхлэн өнөөг хүртэл хүн төрөлхтөний спортын их наадмын төрөлд багтаж буй спорт бөгөөд хүнээс авхаалж самбаа, ур чадвар, оюуны овсгоо, сэтгэлгээний хурд шаардахаас гадна баруун, зүүн тархийг зэрэг хөгжүүлдэг биеэр тоглодог шатар юм. Иймээс сүүлийн үед тулзуур сэлмээр хичээллэгчдийн тоо нэмэгдэж байгааг энэ удаагийн Улсын аваргын тэмцээн харуулав.
Нар минутад мандаж минутад жаргана.
Үс засуулвал: 
Суудал: 
