Монгол, Оросын найрамдал, хамтын ажиллагааны 64 дэх жилийн ойн өдрүүдийн нээлт Соёл, урлагийн цогцолборт өнөөдөр боллоо. Нээлтийн ёслолд Орхон аймгийн Иргэдийн Төлөөлөгчдийн Хурлын дарга Д.Мөнхбат, ЗДТГ-ын дарга Ш.Ганболд, ОХУ-аас Дархан хотод суугаа Ерөнхий консул Зайнутдинов Руслан Амирович, Аймгийн цэргийн штабын дарга, хурандаа Ш.Оюунтүлхүүр, Монгол, Оросын найрамдлын нийгэмлэгийн Орхон аймгийн салбарын тэргүүн Б.Мажинбуу болон аймгийн төр захиргааны болон зэвсэгт хүчний байгууллагуудын төлөөлөл, иргэд оролцлоо.
Иргэдийн Төлөөлөгчдийн Хурлын дарга Д.Мөнхбат хэлсэн үгэндээ: “Хоёр орны Засгийн газрын хамтарсан шийдвэрээр ахмад дайчдын алдар гавьяа зүтгэлийг алдаршуулан мөнхжүүлэх, ОХУ-тай тогтоосон найрсаг харилцаа, хамтын ажиллагааг бэхжүүлэх зорилгоор Халхын голын байлдааны ялалтын 85 жилийн ойг энэ онд тэмдэглэн өнгөрүүлэхээр шийдвэрлэсэн. Энэхүү ойн сарын аяны нээлтийг Эрдэнэт хотод өнөөдөр зохион байгуулж байна. Эрдэнэт хот, үйлдвэрийг барьж байгуулахад орос ахан, дүүсийн оруулсан хувь нэмрийг тоочоод баршгүй. 1938 онд байгуулагдсан Булган аймгийн Хангал сумын нутаг, Эрдэнэт хэмээх ээлтэй уулын буяныг энэ хотын иргэд төдийгүй монгол орны өнцөг булан бүрд ажиллаж амьдарч буй хүн бүр хүртсээр байна. Хоёр улсын найрамдалт харилцааны бэлгэ тэмдэг, хариуцлагатай уул уурхайн жишиг, Эрдэнэт үйлдвэр Монгол Улсад өнгөт металлын үйлдвэрлэл үр ашигтайгаар олон жил тогтвортой үйл ажиллагаа явуулж болдгийн бодит жишээг бидэнд харуулсаар байна. Орхон аймаг нь Монгол Улсын шилдэг аймгаар 13 дахь удаагаа шалгарч, гаргасан амжилтаа бататгасаар ирсэн нь энд үйл ажиллагаа явуулж буй Аж ахуйн нэгж байгууллага, Эрдэнэт хотын иргэн бүрийн хичээл зүтгэл, “Эрдэнэт үйлдвэр” ТӨҮГ-ын уурхайчид, баялаг бүтээгчдийн алдар гавьяа юм” хэмээн онцлов.
Энэ үеэр ОХУ-ын Засгийн газрын шагнал, Халх голын байлдааны ялалтын 85 жилийн ойн медалиар ИТХ-ын дарга Д.Мөнхбат, ЗДТГ-ын дарга Ш.Ганболд, Аж үйлдвэрийн гавьяат ажилтан Б.Мянганбаяр, Гавьяат хуульч Д.Дашням, С.Саадэлэг, бэлтгэл хурандаа Г.Батсуурь, Б.Болдбаатар нарын 22 хүн энгэрээ мялаав.
Мөн Халх голын 85 жилийн ойд зориулсан гэрэл зураг, маркны үзэсгэлэнг тэнд хуран цугларсан зочид төлөөлөгчид үзэж сонирхлоо.
Нар минутад мандаж минутад жаргана.
Үс засуулвал: 
Суудал: 
