“Сэтгэл зүйн эрүүл мэндийн лекц” өдөрлөг боллоо

“Эрдэнэт үйлдвэр” ТӨҮГ-ын ХАБЭА-н хэлтэс, нийгмийн цех, нэгжүүдтэй хамтран “Сэтгэл зүйн эрүүл мэнд” хөтөлбөр хэргэжүүлэх нэг сарын аян зарласан. Аяны хүрээнд “Сэтгэл зүйн эрүүл мэндийн лекц, өдөрлөг” өнөөдөр боллоо. Энэ үеэр Хэрэглээний сэтгэл судлалын үндэсний хүрээлэнгийн мэргэжилтнүүд “Сэтгэл зүйн эрүүл мэнддээ анхаарах нь”, “Неоробик стресс бууруулах аргууд” сэдвээр лекц уншиж, ажилтнуудад ганцаарчилсан зөвлөгөө өгч ажиллав. 
“Сэтгэл зүйн эрүүл мэндийн лекц” сургалтад бүтцийн нэгжүүдийн 110 гаруй ажилтан оролцлоо. Уг сургалтын зорилго нь Сэтгэл зүйн эрүүл мэнддээ анхаарах, урьдчилан сэргийлэх, өдөр тутмын амьдралдаа хэрэгжүүлэх арга техникүүдийг танилцуулах, зөвлөгөө, зөвлөмжөөр дамжуулан ажилтнуудад сэтгэл зүйн эрүүл мэндийн боловсрол олгох, тэдний сэтгэл зүйн тулгамдсан асуудлыг шийдвэрлэхэд нь туслахад оршиж байв. 
ХАБЭАХ-ийн хөдөлмөрийн эрүүл ахуйч О.Орхончимэг ярихдаа: “Ажилчдад мэргэжлийн хүмүүс лекц уншсаны зэрэгцээ сэтгэл зүйн сэдвээр ганцаарчилсан зөвлөгөө өглөө. Нэг сарын аяны хүрээнд ажилчдын сэтгэл зүйн эрүүл мэндийг дэмжих чиглэлээр сургалтууд явагдана. Мөн бүлгийн уулзалтуудыг зохион байгуулна. Хэрэглээний сэтгэл судлалын үндэсний хүрээлэнтэй хамтарч өнөөдрийн сургалтыг зохион байгуулж байна. “Эрдэнэт” сувиллын цогцолборын Сэтгэл засалч эмч ажилчдад сэтгэл зүйн зөвлөгөө өгч ажиллаж байгаа. Энэ сарын 22-нд “Гэр бүлийн үнэ цэнэ” сэдвээр үйлдвэрийн ажилчдад зориулсан өдөрлөгийг Соёл, урлагийн цогцолборт зохион байгуулахаар  төлөвлөөд байна. Түүнчлэн, сэтгэл зүйн эрүүл мэндээ хэрхэн хамгаалах талаар ажилтнуудад контент, пост бэлтгэн мэдээ, мэдээллийг хүргэн ажиллаж байна” гэв.