Эрдэнэт үйлдвэрийн ажилтнууд томуугийн вакцинжуулалтад сайн дурын үндсэн дээр хамрагдаж эхэллээ. Тус үйлдвэр нийгмийн хариуцлагынхаа хүрээнд жил бүр ажилтнуудаа томуу, томуу төст өвчний дэгдэлтэд өртөхөөс урьдчилан сэргийлэх зорилгоор томуугийн вакцинжуулалтад хамруулдаг.
Энэ жилийн томуугийн эсрэг дархлаажуулалтад зориулан, аймгийн Эрүүл мэндийн газраас 800 тун вакцин авч, вакцинжуулалтад хамрагдахаар саналаа өгсөн 27 цехийн 562 ажилтанд энэ сарын 29-ний өдрөөс хийж эхлээд байна. Томуугийн вакцинжуулалтыг үйлдвэрийн Ерөнхий захиргааны 1, 2-р байр, “Эрдэнэт” сувиллын цогцолборын байр зэрэг 3 цэгт 11 сарын 01-ний өдрийг дуустал хугацаанд зохион байгуулж, “Эрдэнэт” сувиллын цогцолборын бага эмч, сувилагч нар тарилгыг хийж, тарилгын дараах урвал хүндрэл өгөх эсэхэд хяналт тавин ажиллаж байна. Өнөөдрийн байдлаар, вакцинд хамрагдахаар бүртгүүлсэн ажилтнуудын 60 хувь нь хамрагджээ. Энэхүү томуугийн вакцин нь Солонгос улсын “Грийн гросс” компанид үйлдвэрлэгдсэн бөгөөд вакцины чанар болон үзүүлэх үйлчлэл зэрэгт аймгийн Эрүүл мэндийн газар тогтмол хяналт тавьж байгаа аж.
Вакцинжуулалт нь хэдийгээр сайн дурын үндсэн дээр хийгдэж байгаа ч томуу, томуу төст өвчний дэгдэлтэд өртөх эрсдэлийг бууруулж, ханиадны хүндрэлээс өөрийгөө болон гэр бүл, ойр тойрныхноо хамгаалах үүднээс дархлаажуулалтад идэвхтэй хамрагдахыг “Эрдэнэт” сувиллын цогцолбороос уриалж байна.
Учир нь сүүлийн үед тархаж буй томуу, томуу төст өвчний вирус нь насанд хүрэгчид болон 13-аас дээш насны хүүхдүүдэд халдсан тохиолдолд ихээхэн хүндрэх хандлагатай байгаа аж. Өөрөөр хэлбэл, томуугийн халдвар авснаас нэг, хоёр хоногийн дараа шууд уушгины хатгалгаа өвчний шинж тэмдэгт шилжсэн тохиолдлууд олон илэрч буйг эмч нар хэлж байна. Иймд уг хүндрэлээс урьдчилан сэргийлэх, эрсдэлээс хамгаалахад вакцин ач тустай гэдгийг зөвлөлөө.
Нар минутад мандаж минутад жаргана.
Үс засуулвал: 
Суудал: 
