Хэвтээ шахалтын тэмцээний үнэмлэхүй аваргаар Ган бөөрөнцгийн цехийн тамирчин М.Дорж шалгарлаа

Эрдэнэт үйлдвэрийн спортын 44-р спартакиадын 5 дахь удаагийн Хэвтээ шахалтын тэмцээн энэ сарын 21-ний өдөр Соёл, урлагийн цогцолборын 2 давхрын фоейд зохион байгуулагдаж, амжилттай өндөрлөсөн. Тус тэмцээний 59кг, 66кг, 74кг, 83кг, 93кг, -105кг, +105кг-ын 7 жинд нийт 21 бүтцийн нэгжийн 70 гаруй тамирчид өрсөлдөж аваргуудаа шалгарууллаа. 
Хэвтээ шахалтын тэмцээний 59кг-ын жинд Засвар, механикийн заводын тамирчин М.Сандагдорж, 66кг-ын Засвар, механикийн заводын тамирчин Э.Баттулга, 74кг-ын жинд Дулааны цахилгаан станцын тамирчин Б.Саранцогт, 83кг, 93кг, -105кг-ын жинд Ил уурхай, Орос 19-р сургуулийн хамтарсан багийн тамирчин Х.Баяраа, Ц.Цэнддорж, Т.Чулуунгэрэл нар, +105кг-ын жинд Ган бөөрөнцгийн цех, “Сэлэнгэ” амралт, аялал жуулчлалын цогцолборын хамтарсан багийн тамирчин М.Дорж нар тус тус тэргүүлсэн. 
Мөн тэмцээний үнэмлэхүй аваргыг “IPF point” үнэлгээгээр тодруулж, ивээн тэтгэгчийн шагнал гардуулсан. +105кг жинд өрсөлдсөн Ган бөөрөнцгийн цехийн тамирчин, 2024 оны Ази тивийн аварга М.Дорж нь 230кг өргөж “IPF point” үнэлгээгээр 95,37 үнэлэгдсэнээр Дотоод, хяналт, мониторингийн хэлтсийн нэрэмжит Шилжин явах цом, 1 сая төгрөгийн эзэн боллоо. 
Энэ удаагийн тэмцээнд Улс, Олон улсын чанартай тэмцээнд тогтмол амжилт үзүүлдэг Үйлдвэрийн газрын шилдэг тамирчид оролцсоноос гадна үзэгчдийн дунд эрэгтэй төрөлд 60кг-ийг хэдэн удаа шахах вэ, эмэгтэй төрөлд 50кг-ийг хэдэн удаа суух вэ зэрэг тэмцээнүүдийг зохион байгуулж, ивээн тэтгэгчээр оролцсон Дотоод хяналт, мониторингийн хэлтсийн нэрэмжит шагналаар урамшуулсан юм.