Эрдэнэт үйлдвэрт хэрэгжиж буй Хүний нөөцийн хөгжлийн цогц хөтөлбөрийн нэг “Манлайлал, авьяас чадварын хөтөлбөр”-ийн оролцогчид өнөөдөр манлайлах, илтгэх ур чадварт суралцлаа.
Ахисан түвшинд гурав дахь жилдээ хэрэгжиж буй уг хөтөлбөрийн оролцогчид өмнө нь манлайлах, удирдах ур чадварт суралцсан бол энэ удаагийн сургалт өөрийн санаа бодлыг итгэл үнэмшилтэйгээр товч тодорхой илэрхийлэх, даалгаврыг ойлголтын зөрүүгүй өгөх, хамт олноо өөрчлөлт, зорилгын төлөө уриалах, сэтгэл санааг нь эерэг байлгах, урам өгөх хүчтэй байх зэрэг сэдвийн хүрээнд явагдав.
“Coach Lab” сургалтын байгууллагыг үүсгэн байгуулагч, мастер сургагч багш Э.Чинзориг сургалтын төгсгөлд, “Эрдэнэт үйлдвэрийн “Манлайлал, авьяас чадварын хөтөлбөр”-ийн залуус оролцоо сайтай, хандлага нь эерэг, нээлттэй, сурч хөгжих тэмүүлэлтэй байдаг нь их таалагддаг” гэж ярьсан юм.
Энэхүү хөтөлбөрт анх манлайлагч 100 залуу хамрагдаж байсан бол, 2023 онд 82, энэ жил 64 ажилтан шалгарч үлджээ. Оролцогчдыг идэвх оролцоо, өөрийгөө хөгжүүлсэн байдалд үнэлгээ өгч чанаржуулдаг. Өнгөрсөн гурван жилийн хугацаанд “Манлайлал, авьяас чадварын хөтөлбөр”-ийн оролцогчдоос 13 ажилтан эрдэм шинжилгээний ажил, илтгэлийн уралдаанд оролцон, шалгарч, 17 ажилтан ажил, алба дэвшин ажиллаж, мэргэжлийн зэргээ ахиулсан үр дүнтэй байна.
Нар минутад мандаж минутад жаргана.
Үс засуулвал: 
Суудал: 
