Эрдэнэт үйлдвэрийн хэмжээнд хэрэгжүүлж буй “Мэдлэг түгээх ажлын байр” төслийн хүрээнд Ус хангамжийн цехийнхэн тоног төхөөрөмж, цахилгаан тоног төхөөрөмжийн засварын хэсгүүдээ Мэдлэг түгээх ажлын байр болгон тохижуулсан байна. Өнөөдөр тус ажлын байранд Хүний нөөц, захиргааны хэлтсийн албаны дарга Б.Одгарьд тэргүүтэй мэргэжилтнүүд ажиллаж, мэдлэг түгээхэд зориулан бүтээсэн төслийн ажилтай танилцав. Ус хангамжийн цехийн хамт олон, тоног төхөөрөмжийн засварын ажлын өрөөнүүдийн зай талбайг ашиглан, засварлах, засах бүхий л арга, аргачлалыг биет загвараар харуулж, байршуулсан нь ихээхэн бүтээлч ажил болжээ.
Ус хангамжийн цехийн Цэвэр ус хангамжийн хэсгийн дарга П.Гансүх, төслийн явц, үр дүн болон шинээр тохижуулсан ажлын байраа танилцуулж, дэлгэрэнгүй мэдээлэл өглөө. Тэрээр, “Мэдлэг түгээх ажлын байрыг хамгийн түрүүнд байгуулсан Авто тээврийн цехийн Технологийн тээврийн засварын хэсгийн хамт олны туршлагаас судалж, газар дээр нь үзэж танилцаад бид ажлаа эхэлсэн. Ингэхдээ цехийнхээ ажлын онцлог, хэрэгцээ шаардлагыг тодорхойлж, хаана, аль хэсэгт мэдлэг түгээх нь оновчтой болохыг судалж үзсэний үндсэн дээр шийдвэрээ гаргаж байв. Хамгийн гол нь манай хамт олон нэгдээд, мэдлэгийн жагсаалтаа гаргасан нь маш үр дүнтэй болсон гэж бодож байна. Ажлын байранд мэдлэгийн жагсаалтыг хэрхэн, яаж шингээж түгээх талаар харилцан санал бодлоо солилцож, биет үзүүлэн, цахим болон гэрэлт самбаруудыг хийж, мэдээлэл олгох байдлаар байрлуулахаар санал нэгдсэн” гэж мэдээлэлдээ дурдав.
Энэ хүрээнд тэд засварын хэсгийн 150 мкв талбайг тохижуулж, мэдлэг бататгах, хадгалах, хуваалцах зориулалт бүхий 79 ширхэг биет үзүүлэнг дотоод боломж бололцоогоо ашиглан хийжээ. Нийт 42 мкв талбайд 57 үзүүлэн самбар, 5 ширхэг гэрэлт самбарын суурь болон металл бэлдэц, эрэг шураг, ган татах, хадгалах, ашиглах мэдээлэл агуулсан гүйдэг хаалгатай шүүгээ хийж байршуулсан байна. Мөн мэдээлэл түгээх байрны гэрлийн урсгалыг нэмэгдүүлсэн нь ажиллах таатай орчныг бүрдүүлжээ. Ус хангамжийн цехийнхэн “Мэдлэг түгээх ажлын байр”-тай болсноор бүтээмж дээшлэх таатай орчин нэмэгдэж, ажилтнуудын сэтгэл ханамж дээшилсэн байна. Мэдлэг олж авахад зарцуулах цаг хугацааг хэмнэж, хэрэгцээт мэдлэг мэдээллийг ил байрлуулан ажилтнууддаа ойртуулсан нь зөв шийдэл болжээ. Ажлын байраараа дамжуулан мэдлэг бүтээх, далд мэдлэгийг илрүүлэн хадгалах орчин бий болж, цаашид мэдлэгээ бататгах, хувиргах, өвлүүлэн үлдээх, суралцах хүсэл эрмэлзэл, чадамжийг нэмж өгсөн өгөөжтэй ажил болсныг нь Хүний нөөц, захиргааны хэлтсийн мэргэжилтнүүд уг төсөлтэй танилцах явцдаа үнэллээ.
Нар минутад мандаж минутад жаргана.
Үс засуулвал: 
Суудал: 
