Спортын 44 дүгээр спартакиадыг Баяжуулах үйлдвэр хошуучилж явна

Эрдэнэт үйлдвэрийн ажилчдын спортын 44 дүгээр спартакиадыг одоогийн байдлаар Баяжуулах үйлдвэрийн баг, тамирчид хошуучилж явна, гэж Ерөнхий шүүгч, Спорт цогцолборын ахлах арга зүйч Э.Эрдэнэбаяр мэдээллээ. Удаах байрт Авто тээврийн цех, Цахилгаан цех болон Аж ахуй, үйлчилгээний цехийн хамтарсан баг, Дулааны цахилгаан станцын багууд ойрхон оноотой явна. 
Өнөөдөр болсон олс таталтын тэмцээний эрэгтэйчүүдийн төрөлд Баяжуулах үйлдвэрийн баг тамирчид тэргүүлсэн бол дэд байрыг Оёдлын цех болон Засвар угсралтын цехийн хамтарсан баг эзэлжээ. Эмэгтэйчүүдийн төрөлд мөн Баяжуулагч бүсгүйчүүд түрүүлж, Онцгой байдал болон “Эрдэнэт медикал” эмнэлгийн хамтарсан баг удаалав. 
Харин бадминтоны төрөлд тэргүүн байрыг Авто тээврийн цех, дэд байрт Спорт цогцолбор, Геологи хайгуулын экспедицийн хамтарсан баг, гутгаар байрт Ил уурхай болон 19 дүгээр сургуулийн хамтарсан баг шалгараад байна. 
Ширээний теннисний төрөлд Баяжуулагчид тэргүүлж, Цахилгаан цех болон Аж ахуй, үйлчилгээний цехийн хамтарсан баг, Авто тээврийн цехийн баг тамирчид удаалсан байна.  
44 дүгээр спартакиадын гадаах төрлүүд болох хөнгөн атлетик, хөл бөмбөг, талбайн теннисний тэмцээн өнгөрсөн есдүгээр сард зохион байгуулагдаж дүнгээ гаргасан. Хөнгөн атлетикийн төрөлд Баяжуулах үйлдвэр нэгдүгээр байрт, Засвар, механикийн завод хоёрдугаар байрт, Цахилгаан цех болон Аж ахуй, үйлчилгээний цехийн хамтарсан баг гуравдугаар байрт бичигдсэн. Харин Хөл бөмбөгийн төрөлд Дулааны цахилгаан станц түрүүлж, удаах байруудад Ил уурхай болон 19 дүгээр сургуулийн хамтарсан баг, Баяжуулах үйлдвэрийн баг тодорчээ. Талбайн теннисний төрөлд нэгдүгээр байрыг Авто тээврийн цех, хоёрдугаар байрыг Дулааны цахилгаан станц, гуравдугаар байрыг “Сэлэнгэ” амралт, аялал жуулчлалын цогцолбор болон Ган бөөрөнцгийн цехийн хамтарсан баг эзэлжээ.  
Уурхайчдын 44-р спартакиадад Эрдэнэт үйлдвэрийн бүтцийн нэгжийн 18 багийн тамирчид спортын 14 төрлөөр хурд хүч, авхаалж самбаагаа сорин өрсөлдөж байна. Ирэх өдрүүдэд волейбол, дартс, шатар, даам, усанд сэлэлт, корнхолл тэмцээнүүд зохион байгуулагдаж шилдгүүдээ тодруулах юм.