Аж ахуй, үйлчилгээний цехийнхэн баяраа тэмдэглэв

Саяхан Аж ахуй, үйлчилгээний цехийн хамт олон Нийтийн аж ахуйн 93 жилийн ойн баяраа ёслол төгөлдөр, сюрприз дүүрэн тэмдэглэжээ. Эрдэнэт үйлдвэрийн өнгө төрхийг бүрдүүлж, эмх цэгцтэй, эрэмбэ дараатай байлгах эрхэм үүрэг хүлээдэг үйлчилгээний ажилтнуудад энэ өдөр шагналын хур буусан байна.  
“Нийтийн аж ахуйн тэргүүний ажилтан” хүндэт тэмдгээр ажилтан Ч.Уранчимэг, Э.Оюун-Эрдэнэ, Ё.Бурмаа, Барилга хот, байгуулалт, орон сууцжуулалтын яамны “Хүндэт жуух” бичгээр  ажилтан Ц.Тунгалаг, Ц.Отгонжаргал, И.Халтархүү, Төр Засгийн үйлчилгээ эрхлэх газрын “Хүндэт жуух бичиг”-ээр ажилтан Ч.Буянхишиг, Ж.Баяртуяа, Х.Заяахүү, Орхон аймгийн Засаг даргын Жуух бичгээр Б.Энхманлай, Я.Амармэнд нар шагнагджээ. Харин Монголын эмэгтэйчүүдийн холбооны хүндэт тэмдгээр Д.Амаржаргал, З.Сувд-Эрдэнэ, Үйлдвэрчний эвлэлийн холбооны “Уурхайчны алдар” тэмдгээр Х.Заяахүү, Монголын Залуучуудын холбооны “Залуу үеийг халамжлан хүмүүжүүлэгч” цол тэмдгээр үйлчилгээний ажилчин Д.Байгалмаа, “Хөдөлмөрийн алдар” тэмдгээр Б.Анхбаяр, Б.Бадамхорлоо нар энгэрээ мялаав. Цехийн даргын тушаалаар М.Цэрэнханд, Б.Эрдэнэчимэг, Г.Болдбаатар, Б.Бадмаа, Н.Баяр-Отгон нар мөнгөн шагнал хүртжээ.
Энэ үеэр Эрдэнэт үйлдвэрийн Хөдөлмөрийн аварга Д.Байгалмаа, ахмад ажилтан Х.Заяахүү нар өөрсдийн нэрэмжит сугалаа болгон, ухаалаг шал угаагч, агааржуулагч, ухаалаг чанагч, халзан цагаан хонь зэргийг сугалуулж, азтанаар ажилтан Б.Нэргүй, С.Мөнхжаргал, Д.Батжаргал, М.Оюунбат нар тодорчээ. Хамт олон нь хоёр ажилтандаа чин сэтгэлийн баяр хүргэж, талархал илэрхийлсэн. 
Аж ахуй, үйлчилгээний цехийн нийт ажилтны 60 хувь нь салбарынхаа “Тэргүүний ажилтан” байгаа нь том үнэлгээ юм. Баярын үйл ажиллагаа үйлчлэгчийн мэргэжил олгох сургалт, ажил мэргэжлийн уралдаан, волейболын тэмцээн, сайн үйлсийн аянаар цаашид үргэлжилнэ гэж тус цехийн хүний нөөцийн мэргэжилтэн Ж.Болормаа мэдээллээ.