Авлигатай тэмцэх газрын дэргэдэх Олон нийтийн зөвлөлийн дарга Г.Ганбат тэргүүтэй тус зөвлөлийн гишүүд Эрдэнэт үйлдвэрт ажиллаж байна. Тус зөвлөлийн гишүүд, томилолтын ажлын эхэнд Эрдэнэт үйлдвэрийн удирдлагуудтай уулзаж, харилцан санал бодлоо солилцов. Уулзалтын үеэр “Эрдэнэт үйлдвэр” ТӨҮГ-ын Ерөнхий захирал Г.Ёндон, үйлдвэрийн үйл ажиллагаа болон авлигатай тэмцэх, урьдчилан сэргийлэх чиглэлээр хийж, хэрэгжүүлж буй арга хэмжээний талаар дэлгэрэнгүй мэдээлэл өглөө.
“Эрдэнэт үйлдвэр” ТӨҮГ, авлигын эсрэг, түүнээс урьдчилан сэргийлэх ажил, арга хэмжээг АТГ-аас өгч буй зөвлөмж, чиглэл, олон улсын стандарт, Монгол Улсын хууль тогтоомжийн хүрээнд хэрэгжүүлж байна. Дэлхийн улс орнууд өнөөдөр авилгаас ангид байх зарчим хэрэгжүүлж байгаачлан Эрдэнэт үйлдвэрт төрийн үйлчилгээ, төрийн өмчийн газруудын үйл ажиллагааг ил тод, шилэн байлгах зорилттой ажиллаж буйг Ерөнхий захирал Г.Ёндон мэдээлэлдээ онцлов. Тэрээр, бүтэн жилийн дүр зураглалаар мэдээлэх үүднээс 2023 оны худалдан авах үйл ажиллагааны талаар дурдсан. Өнгөрсөн оны байдлаар, Эрдэнэт үйлдвэрийн хэмжээнд худалдан авалтын 1569 тендер шалгаруулалт төлөвлөгдөж, тэдгээрийн үнэлгээний хороонд 300 орчим ажилтан ажилласан байна. Эдгээрт давхардсан тоогоор 4760 компани оролцсон бөгөөд нэг компанийн тендерт бүрдүүлж ирүүлсэн материал гэхэд 100-200 хуудастай байдаг. Нэг үнэлгээний хороо дунджаар 5 компанийн материалтай танилцдаг гэж үзвэл, нэг гишүүн үндсэн ажлынхаа зэрэгцээ 500-1000 хуудас бүхий материал уншиж танилцаж, үнэлэх шаардлагатай болдог гэсэн үг. Энэ ажиллагааг хөнгөвчлөх, алдаа гаргахаас сэргийлэх, авлига ашиг сонирхлоос ангид байж, шударга үнэлгээ хийх зорилгоор худалдан авах ажиллагаанд хиймэл оюун ухаанд суурилсан “Tender eval” өнгөрсөн 6 дугаар сард нэвтрүүлээд байгааг дэлгэрэнгүй танилцууллаа.
УИХ-ын 2023 оны 6 дугаар сарын 30-ны өдрийн 59-р тогтоол, 2024 оны 46-р тогтоолоор “Авлигатай тэмцэх үндэсний хөтөлбөр”-ийг хэрэгжүүлэх арга хэмжээний төлөвлөгөөг баталсан. Энэ дагуу үйл ажиллагаа зохион байгуулж, заасан хугацаанд хэрэгжилтийг ханган, танилцуулах үүрэг даалгаврыг Эрдэнэт үйлдвэр биелүүлэн ажиллаж байна. 2024 онд үйлдвэрийн Ерөнхий захирлын тушаалаар “Авилгаас урьдчилан сэргийлж, соён гэгээрүүлэх болон Үндэсний хөтөлбөр”-ийг хэрэгжүүлэх ажлын төлөвлөгөөг баталсан юм. Түүнчлэн, Авлигатай тэмцэх Үндэсний хорооны тогтоолоор АТГ-аас өгсөн үүргийн дагуу “Эрдэнэт үйлдвэр” ТӨҮГ-т, MNS ISO 37001 авлигатай тэмцэх менежментийн олон улсын тогтолцооны стандартыг нэвтрүүлэх ажлын бэлтгэл хангаж байна. Энэ талаарх мэдээллийг Эрдэнэт үйлдвэрийн холбогдох газар, хэлтсүүд АТГ-ын Олон нийтийн зөвлөлийн төлөөлөгчдөд танилцуулах аж.
АТГ-ын дэргэдэх Олон нийтийн зөвлөлийн бүрэлдэхүүн, Эрдэнэт үйлдвэрт хоёр өдрийн турш ажиллах бөгөөд тус үйлдвэрийн үйлдвэрлэлийн цехүүдийн үйл ажиллагаатай танилцан, Үйлдвэрчний эвлэлийн холбооны удирдлага, бүтцийн нэгжүүдийн ҮЭ-ийн хороодын дарга, төлөөлөлтэй уулзалт хийх юм байна.
Нар минутад мандаж минутад жаргана.
Үс засуулвал: 
Суудал: 
