Энэ оны эрүүл мэндийн урьдчилан сэргийлэх үзлэг Ерөнхий захирлын А/108 тоот тушаалын дагуу гуравдугаар сард эхэлсэн. Үйлдвэрийн ажиллагсдыг эрүүл мэндийн үзлэг шинжилгээнд бүрэн хамруулах ажлыг “Эрдэнэт медикал” эмнэлэгтэй 8 дахь жилдээ хамтран зохион байгуулж байна. Нийт ажилтнууд, ахмадууд, үйлдвэрлэлийн осол, хурц хордлого, мэргэжлээс шалтгаалах өвчний улмаас хөдөлмөрийн чадвар алдалтын хувь тогтоолгосон болон гэрээт байгууллагуудын нийт 9000 иргэнийг 11 багцын үзлэг шинжилгээнд хамруулж байгаа юм. Одоогийн байдлаар нийт 6471 хүн буюу 72 хувь нь эрүүл мэндийн үзлэгт хамрагджээ.
“Эрдэнэт” сувиллын цогцолборын статистикч эмч Ж.Эрдэнэчимэг: “Хуваарийн дагуу цехүүд эрүүл мэндийн үзлэгт орж байна. Үлдсэн хугацаанд өдөрт 50-55 хүн үзлэгт хамрагдана. Эхний 9 сард нэмэлт үзлэг, шинжилгээнд илгээх шаардлагатай 327 хүн байсан. Үүний 159 хүнийг дараагийн лавлагаа шатлалын эмнэлэгт илгээж, үзлэгт оруулан, эмчилгээ болон эмчилгээний дэглэмийн талаар зөвлөгөө өгч, хяналт тавин ажиллаж байна. Урьдчилан сэргийлэх үзлэгээр хавдрын 11 өвчнийг эрт үед нь илрүүлж, химийн болон мэс заслын эмчилгээнд оруулан, хяналтад эмчилж байгаа. Мөн “Эрдэнэт медикал” эмнэлэгт 67 хүн хэвтэж эмчлүүлсэн. Урьдчилан сэргийлэх үзлэгийн явцад өөрчлөлттэй, анхаарах шаардлагатай хүмүүсийн мэдээллийг “Эрдэнэт медикал” эмнэлгээс 14 хоног тутам авч цех хариуцсан эмч нарт хүлээлгэн өгдөг. Ингэснээр цехийн эмч нь ажилтнуудтайгаа уулзаж, үзлэг шинжилгээний дүгнэлтийг тайлбарлан, цаашид авах арга хэмжээ, эмчилгээний талаар зөвлөгөө өгч ажиллаж байна” гэв.
Нар минутад мандаж минутад жаргана.
Үс засуулвал: 
Суудал: 
