Харилцан ойлголцлын санамж бичиг үзэглэлээ

“Эрдэнэт үйлдвэр” ТӨҮГ-ын Ерөнхий захирал Г.Ёндон, “Мэдээлэл холбооны сүлжээ” ТӨХХК-ийн Гүйцэтгэх захирал Б.Мөнхбат нар хамтран ажиллах Харилцан ойлголцлын санамж бичигт өнөөдөр гарын үзэг зурлаа. Энэхүү ёслолд Эрдэнэт үйлдвэрийн Мэдээллийн технологийн хэлтсийн дарга Б.Гансүх, албаны дарга М.Мөнхбаатар, мэдээллийн аюулгүй байдлын тэргүүлэх мэргэжилтэн Б.Гансэрээтэр, “Мэдээлэл холбооны сүлжээ” ТӨХХК-ийн Менежмент зохицуулалтын албаны дарга Э.Сугаррагчаа, Технологийн үйлчилгээний бизнесийн газрын захирал Н.Дугар, Технологийн шинэ үйлчилгээний хэлтсийн дарга Х.Батбаяр нар оролцов.         
Харилцан ойлголцлын санамж бичиг үзэглэхийн өмнө Эрдэнэт үйлдвэрийн Ерөнхий захирал Г.Ёндон үг хэлэхдээ, Мэдээлэл, харилцаа холбооны орчин үеийн дэвшилтэт технологи нийгэм, эдийн засгийн амьдралд гүнзгий нэвтэрч, улс орноороо дижитал шилжилт, технологийн өөрчлөлт, шинэчлэлийн үед бид ажиллаж амьдарч байна. Төрийн байгууллагууд, төрийн болон хувийн хэвшлийн аж ахуйн нэгжүүд, компаниудын үйл ажиллагаа цахим болж, хиймэл оюун ухаан, хөвүүлэн тооцоолуур өргөн нэвтэрч байна. Монгол Улсын Засгийн газрын 2024-2028 оны үйл ажиллагааны хөтөлбөрт дэвшилтэт технологид суурилсан цахим засаглалыг хөгжүүлэх, мэдээлэл, харилцаа холбоо, хиймэл оюун ухаан, шинэ технологийг уул уурхай, боловсруулах аж үйлдвэр, эрчим хүчний салбарт өргөн нэвтрүүлэх томоохон зорилт дэвшүүлсэн. Энэ цаг үед асар их мэдээлэл, өгөгдөл цахимаар дамжуулах бодит шаардлага, хэрэгцээ бий болж байгаагийн зэрэгцээ мэдээллийн аюулгүй байдлын эрсдэл бодитой оршиж, хурдацтайгаар өсөн нэмэгдэж байна. Иймээс “Эрдэнэт үйлдвэр” ТӨҮГ-т Мэдээллийн аюулгүй байдлыг хангах тогтолцоо бий болгох, төрөл бүрийн кибер довтолгоо, халдлагаас хамгаалах, сөрөн зогсох талаар холбогдох төр захиргааны байгууллагууд болон энэ талын мэргэжлийн байгууллагуудтай хамтын ажиллагааг хөгжүүлж, хамтран ажиллах, стратеги төлөвлөгөө боловсруулан хэрэгжүүлэх бодит шаардлага зүй ёсоор тавигдаж байгааг онцоллоо. 
 Харилцан ойлголцлын санамж бичгийн хүрээнд Эрдэнэт үйлдвэрийн дүүрэгт харилцаа холбооны худаг сувагчлал байгуулах, өргөтгөх, шилэн кабель болон холбооны тоног төхөөрөмж сурилуулах, мэдээлэл, харилцаа холбооны дэвшилтэт техник технологи нэвтрүүлэх, үйлчилгээ үзүүлэх, дэд бүтцийг бэхжүүлэх зэрэг олон чиглэлээр хамтран ажиллахаар тусгагджээ. Хамтын ажиллагааны хамгийн гол зорилт нь мэдээллийн аюулгүй байдлын аудит, кибер аюулгүй байдлын эрсдэлийн үнэлгээ хийх зэргээр орчин үед тулгарч буй тулгамдсан асуудлуудыг шийдвэрлэх чиглэлд ирэх жилүүдэд хоёр тал хамтран ажиллахаар санамж бичиг үзэглэлээ.  
“Мэдээлэл холбооны сүлжээ” ТӨХХК-ийн Гүйцэтгэх захирал Б.Мөнхбат, хоёр талын хамтын ажиллагааны шинэ чиглэлүүд Эрдэнэт үйлдвэр төдийгүй Орхон аймаг, цаашлаад Монгол Улсын мэдээлэл, харилцаа холбооны хөгжилд том ахиц авчирна гэдэгт төгс байгаагаа илэрхийлэв.