Эрдэнэт үйлдвэрийн хэмжээнд Хүний нөөцийн хөгжлийн цогц хөтөлбөр хэрэгжиж байгаагийн нэг нь “Манлайлал, авьяас чадварын хөтөлбөр” юм. Тус хөтөлбөрийн хүрээнд оролцогчдын мэдлэг, ур чадварыг хөгжүүлэх, тэдний санал санаачилгад тулгуурлан үйлдвэрийн газарт тулгамдаж буй асуудлыг шийдвэрлэх, бүтээмжийг дээшлүүлэх, ажил сайжруулах, үргүй зардлыг багасгах, нийгэмд эерэг өөрчлөлт бий болгох чиглэлээр олон төрлийн ажил хийгджээ.
Тэгвэл “Манлайлал” авьяас чадварын хөтөлбөр"-ийн ээлжит хэлэлцүүлэг “Оюу” танхимд өчигдөр боллоо. Хэлэлцүүлгийн эхэнд Хүний нөөц, захиргааны хэлтсийн дарга О.Отгонбаяр хийсэн мэдээлэлдээ: “Энэ хөтөлбөрт үйлдвэрийн газрын анхан болон дунд шатны 100 оролцогч хамрагдсан. Өнгөрсөн гурван жилийн хугацаанд энэ хөтөлбөрөөр дамжуулан Эрдэнэт үйлдвэрийн удирдах ажилтнуудын нөөцийг бэлтгэх, өсөх ирээдүйтэй боловсон хүчнүүдэд ажлын арга барил, ур чадвар эзэмшүүлэх чиглэлээр олон шинэлэг санал санаачилга гарган ажиллалаа. Уг хөтөлбөрийн үр дүнд 13 ажилтан тушаал дэвшин Эрдэнэт үйлдвэрийн удирдах бүрэлдэхүүнд орж амжилттай ажиллаж байна” хэмээн ярилаа.
Мөн “Манлайлал, авьяас чадварын хөтөлбөр”-ийн явц, үр дүн, төлөвлөгөөний биелэлт, хийгдэх ажлуудын талаар Ажлын хэсгийн дарга Т.Атарбаяр танилцуулсан бол “LEAD4EMC”-багийн гишүүн А.Мөнгөнсар, “INFLUENCER” багийн нарийн бичгийн дарга Н.Амартүвшин, “SYNERGY” багийн ахлагч Ч.Баярмагнай нар товч мэдээлэл хийв.
Харин УИХ-ын Тамгын газрын дэд дарга, Хойд бүсийн хөгжлийн төвийн удирдах зөвлөлийн дарга Ү.Амарбат: “Эрдэнэт үйлдвэр бусдыг ямагт манлайлж ирсэн. Үүний нэг нь Хүний нөөцийн манлайллын хөтөлбөр юм. Удирдах ажилтнуудыг бэлтгэх, хүний хөгжлийн асуудал нэн чухал байдаг. Энэ утгаараа Эрдэнэт үйлдвэр Хүний хөгжлийн чиглэлээр цогц хөтөлбөр хэрэгжүүлж буй нь өндөр ач холбогдолтой. Манлайллын багийнхан нэг асуудлыг сонгон авч шалтгаан нөхцөлийг тогтоон, гарах шийдэл дээр гүйцэтгэл хийж ажилласан байна. Тэгэхээр Орхон аймаг, Эрдэнэт үйлдвэрийн удирдлагууд, Хойд бүсийн мэргэжилтнүүд хамтран ажлын хэсэг байгуулсан. Энэ ажлын хэсэг ойрын 10 жилд хэрэгжүүлэх Эрдэнэт хот, үйлдвэрийн хөгжлийн дунд, урт хугацааны зорилгыг тодорхойлсон, хэмээн онцлоод “Эрдэнэт шинэ илгээлт” сэдэвт томоохон 12 төсөл хөтөлбөрийн талаар дэлгэрэнгүй танилцууллаа. Эрдэнэт үйлдвэрт хэрэгжиж буй Хүний нөөцийн хөгжлийн цогц хөтөлбөрийн хэлэлцүүлэг өнөөдөр үргэлжлэн явагдаж байна.
Нар минутад мандаж минутад жаргана.
Үс засуулвал: 
Суудал: 
