Үйлдвэрлэлийн төлөвлөгөөний биелэлтийг хангах, уулын ажлын зарим үзүүлэлтийн хоцрогдлыг арилгах зорилгоор үйлдвэрийн хэмжээнд “Эрчимжүүлсэн төлөвлөгөө”-г батлан хэрэгжүүлж байна. Ил уурхайд “Эрчимжүүлсэн төлөвлөгөө” хэрэгжиж, сарын эхний хагаст төлөвлөгөө биелж буйг тус цехийн удирдлага мэдээлэв. Эрчимжүүлсэн төлөвлөгөө боловсруулан, үйлдвэрлэлийн цехүүд уртасгасан цагаар буюу амралтын өдрүүдэд ажилласны үр дүнд оны эхнээс хоцрогдолтой байсан үзүүлэлтүүд төлөвлөсөн хэмжээнд хүрч, сарын төлөвлөгөө биелж байна. Иймд уулын цул гаргалт, баяжмал ачилт зэрэг ажлын төлөвлөгөөний хоцрогдолд нөлөөлж буй хүчин зүйл, тоног төхөөрөмжийн ханган нийлүүлэлтэд онцгой анхаарч, шуурхай арга хэмжээ авч ажиллахыг Ерөнхий инженер онцлов.
Авто тээврийн цехэд шинээр хүлээн авсан 140 тонны өөрөө буулгагч техник ажилд гарснаас хойш 440 гаруй эргэлт хийж, 23.3 мянган метр куб уулын цул тээвэрлэсэн байна. Дараагийн ээлжийн хүнд даацын таван авто машиныг энэ сарын сүүлээр хүлээж авахаар төлөвлөж буй аж. Авто тээврийн цех парк шинэчлэлийн хүрээнд энэ оны хөрөнгө оруулалтын төлөвлөгөөний дагуу нийт хүнд даацын 10 машин техник авах бөгөөд үлдсэн дөрвөн машин техникийг ирэх аравдугаар сард багтаан нийлүүлэх юм байна.
Захиргаа, удирдлага, санхүүгийн газрын дарга Д.Баярбат, 2025 оны бизнес болон хөрөнгө оруулалтын төлөвлөгөө боловсруулж буйтай холбогдуулан мэдээлэл хийв. Тэрээр, хөрөнгө оруулалтын төлөвлөгөөнд санал өгдөг үйлдвэрийн бүтцийн нэгжийн удирдлагууд “Эрдэнэс Монгол” нэгдлээс ирүүлэх аргачлалын дагуу төлөвлөгөөгөө боловсруулахыг анхаарууллаа. Хэрэв энэхүү аргачлал, тавигдах шаардлагын дагуу төлөвлөөгүй тохиолдолд ирэх оны хөрөнгө оруулалтын төлөвлөгөөнд тусгах боломжгүй, нөгөө талаар “хөнжлийнхөө хэрээр хөлөө жийнэ” гэдэгчлэн оновчтой, зөв хөрөнгө оруулалт хийх ажлаа нарийн нягт эрэмбэлж оруулахыг онцгойлон сануулав.
Өнгөрсөн долоо хоногт эхэлсэн Оюутын ордын хайгуулын далд нэвтрэлтийн өрөмдлөгийн ажил хэвийн үргэлжилж байна. Гүйцэтгэгчээр ажиллаж буй “Евроашиан Майнинг Контрактор” компанийн зүгээс өдөр тутмын болон долоо хоногийн тайлангаа ирүүлж байгааг үйлдвэрийн Ерөнхий геологич Д.Алтанхуяг мэдээлэлдээ дурдлаа. Хайгуулын ажлын явцыг хянах ажлын хэсэг байгуулагдан ажиллаж байгаа бөгөөд ажлын хэсгийг Хөгжлийн хэлтэс ахалж, Үйлдвэрлэл, техникийн хэлтэс, Геологи, Маркшейдерийн хэлтэс, Ил уурхай, Судалгаа, шинжилгээний хүрээлэн зэрэг бүтцийн нэгжүүд бүрэлдэхүүнд нь багтжээ. Өнөөдрийн байдлаар, тэсэлгээний өрөмдлөгийн ажил бүрэн дуусаж, бэхэлгээний ажил 80 хувийн гүйцэтгэлтэй байгаа аж.
Нар минутад мандаж минутад жаргана.
Үс засуулвал: 
Суудал: 
