“Эрдэнэс ҮТП” ХХК-иас ирүүлсэн тусгай зөвшөөрөл авах саналыг Орхон аймгийн ИТХ-ын ээлжит бус хуралдаанаар дэмжлээ

        Орхон аймгийн ИТХ-ын ээлжит бус 18 дугаар хуралдаан өнөөдөр болж, тус хуралдаанаар “Эрдэнэс ҮТП” ХХК-ийн ирүүлсэн тусгай зөвшөөрөл авах саналыг дэмжлээ. Хуралдаанд “Эрдэнэс Монгол” нэгдлийн дэргэдэх “Эрдэнэс ҮТП” ХХК болон Эрдэнэт үйлдвэрлэл, технологийн паркийн товч танилцуулга, үйл ажиллагааны талаар “Эрдэнэс ҮТП” ХХК-ийн Менежер Б.Мягмаржаргал мэдээлэл хийв.

       “Эрдэнэс ҮТП” ХХК нь стратегийн хүрээнд тус бүр найман зорилт бүхий дөрвөн үндсэн чиглэлээр үйл ажиллагаа, бодлого хөтөлбөрөө тодорхойлон 2028 он хүртэл хэрэгжүүлэхээр ажиллаж байна. Тус компани Монгол Улсын хөгжлийн бодлого, зах зээлийн хэрэгцээ шаардлага, бүс нутгийн геологийн нөөц, дулаан, эрчим хүч, тээвэр логистик, усны хангамж зэрэг дэд бүтэц, ажиллах хүчний нөөцөд тулгуурлан зургаан байршилд байгуулах үйлдвэрлэл, технологийн паркуудын үйл ажиллагааг хариуцах юм. Эдгээр байршилд Эрдэнэт, Тавантолгой, Бор-Өндөр, Дархан, Хөтөл, Багануурын үйлдвэрлэл, технологийн парк байгуулагдана. Өнөөдрийн байдлаар, дээрх зургаан үйлдвэрлэл, технологийн паркаас “Эрдэнэт үйлдвэр” ТӨҮГ-ыг түшиглэн барьж буй Эрдэнэт үйлдвэрлэл, технологийн паркийн үйл ажиллагаа жигдэрч, дэд бүтцийн ажил эрчимтэй урагшилж буйг “Эрдэнэс ҮТП” ХХК-ийн Менежер Б.Мягмаржаргал танилцуулгадаа онцлов.

        Эрдэнэт үйлдвэрлэл, технологийн паркийг Орхон аймгийн Баян-Өндөр сумын нутагт орших Эрдэнэтийн-Овоо зэс, молибдены ордыг түшиглэн Зэс боловсруулах цогцолбор чиглэлээр байгуулах тул орон нутгийн засаг захиргааны байгууллагын зөвшөөрөл авах шаардлагатай. Тиймээс “Эрдэнэс ҮТП” компанийн үйл ажиллагааг танилцуулж, тусгай зөвшөөрөл авах саналаа хүргүүлж буй аж.

         Өнөөдрийн байдлаар, Эрдэнэт үйлдвэрлэл, технологийн паркийн төмөр зам, авто замын бүтээн байгуулалтын ажлын явц 55 хувьтай үргэлжилж байна. Тус паркийн бүтээн байгуулалтын эхний үе шатыг 2028 онд дуусгаж, ашиглалтад оруулах бөгөөд катодын зэс, ферромолибден үйлдвэрлэж эхлэх юм.

        Эрдэнэт үйлдвэрлэл, технологийн парк байгуулагдсанаар жилдээ 1.3 тэрбум ам.долларын орлого олж, 91.4 сая ам.долларын цэвэр ашигтай ажиллах тооцоо гарсан байна. Мөн энд нийт 1300 орчим ажлын байр бий болох юм.