Удирдах ажилтнуудын даваа гарагийн шуурхай зөвлөгөөнийг Үйлдвэрлэл, техникийн хэлтсийн дарга Т.Түмэн-Өлзий удирдлаа. Өнгөрсөн долоо хоногт ХАБЭА-н хэлтсээс аюулгүй ажиллагааны чиглэлээр урьдчилан сэргийлэх 100 гаруй ажил хийж, ээлжит сургалтууд зохион байгуулсан байна. Эрдэнэт үйлдвэрийн санаачилга, дэмжлэгээр Сэлэнгэ аймгийн Ерөө суманд хийж буй байгалийн нөхөн сэргээлтийн үйл ажиллагаатай Байгаль орчин, уур амьсгалын өөрчлөлтийн яамны сайд С.Одонтуяа энэ долоо хоногт танилцах юм байна. Үүнтэй холбогдуулан нөхөн сэргээлтийн ажлын үйл явц, үр дүнгийн талаар тодорхой мэдээлэл бэлтгэж хүргэхийг БОНХХ-т үүрэг болголоо.
Үйлдвэрлэлийн үйл ажиллагаа, төлөвлөгөөний биелэлтийг ханган ажиллах зорилгоор Үйлдвэрлэл, техникийн хэлтсээс Эрчимжүүлсэн төлөвлөгөө боловсруулан, хэрэгжүүлж байна. Ингэснээр үйлдвэрлэлийн үндсэн үзүүлэлтийн төлөвлөгөөний хоцрогдлыг арилгах, бүрэн биелүүлэх нөхцөл бүрдэж байна. Намар өвлийн бэлтгэл ажлын гүйцэтгэл үйлдвэрийн хэмжээнд 55 хувьтай байна. Нийт 293 ажил төлөвлөснөөс өнөөдрийн байдлаар, 84 ажил бүрэн хийгдэж дуусжээ.
Ил уурхайнхан, эрчимжүүлсэн төлөвлөгөөний дагуу ажиллаж буйгаа мэдээлэв. Намар өвлийн бэлтгэл ажил 52 хувьтай байгаа бол өнгөрсөн долоо хоногийн дүнгээр нийт ажилтнуудын 85 хувь нь эрүүл мэндийн урьдчилан сэргийлэх үзлэгт хамрагджээ. Баяжуулах үйлдвэрт хөдөлмөр, техникийн зохион байгуулалт хийж, эрчимжүүлсэн төлөвлөгөөг хэрэгжүүлж эхэлжээ. 9 сар гарсаар хүдэр боловсруулалтын төлөвлөгөө давж биелж буйг Баяжуулах үйлдвэрийн Ерөнхий инженер онцлов.
Өнгөрсөн амралтын өдрүүдэд ДЦС-ын төлөвлөгөөт Их зогсолт хийгдэж, энэ хүрээнд төлөвлөсөн 100 гаруй ажлаа бүрэн гүйцэтгэсэн байна. Мөн нэмэлтээр 6 ажил Их зогсолтын хугацаанд хийж дуусгажээ. Энэ ажлын үр дүнд Баяжуулах үйлдвэр болон Засвар, механикийн заводод хийгдэж буй өргөтгөл, шинэчлэлийн ажлын эрчим хүчний хангамж дээшлэх юм. Мөн Ус хангамжийн цехэд Эбара фирмийн шинэ насос суурилуулсан бөгөөд энэ нь эрчим хүчний хэрэглээг бууруулахад эерэг нөлөө үзүүлэх боломж бүрдэж байгаа юм байна.
Оюутын ордод 5 техник ажиллаж байгаа бөгөөд өнөөг хүртэл 11552 тууш метр өрмийн ажил гүйцэтгээд байна. Намар, өвлийн бэлтгэл хангалт 80 хувийн биелэлттэй байгаа аж. Энэ сарын 15-нд албан байгууллагуудад халаалт өгч эхэлнэ. Иймд халаалт хүлээж авахад бэлдэх шаардлагатайг Эрчим хүчний хэлтсээс анхааруулав.
Эрдэнэт үйлдвэр одоогийн байдлаар улс, орон нутгийн төсөвт 965 тэрбум төгрөгийн татвар бүрдүүлж, Монгол банканд 661 мянган ам.доллар тушаасан байна. Түүнчлэн, 2024 оны эхний хагас жилд үйлдвэрлэлийн төлөвлөгөөт бүх үзүүлэлтийг 100-аас дээш хувиар биелүүлж, түүнийг дагаад санхүү, эдийн засгийн үзүүлэлт өсөж, сайн дүнтэй байгаа нь “Эрдэнэс Монгол” компанийн харьяа байгууллагуудын хагас жилийн үйл ажиллагааны тайлангийн хурлаас өндөр үнэлгээ авчээ. Энэ тухай мэдээллийг Ерөнхий захирал Г.Ёндон шуурхай зөвлөгөөний үеэр өгч, 2025 оны хөрөнгө оруулалтын төлөвлөгөөг нягт нямбай боловсруулах, бусад үйлдвэрлэлийн зорилт, зорилгыг биелүүлэхийн тулд эрчимжүүлсэн төлөвлөгөөг бүрэн дүүрэн хэрэгжүүлэн ажиллах чиглэлийг бүтцийн нэгжийн удирдлагуудад өглөө.
Нар минутад мандаж минутад жаргана.
Үс засуулвал: 
Суудал: 
