Эрдэнэт үйлдвэрийн удирдлагуудын даваа гаргийн ээлжит шуурхай зөвлөгөөнийг Ерөнхий инженер Т.Батмөнх удирдаж, цех нэгжүүд мэдээлэлдээ үйлдвэрийн хэмжээнд намар, өвлийн бэлтгэл хэрхэн хангагдаж буй явц, хүндрэл бэрхшээл, шинэ бүтээн байгуулалтын ажил, үйлдвэрлэл, технологийн паркийн төслийн хэрэгжилтийн талаар танилцуулахыг шуурхайн эхэнд онцлов.
Өнгөрсөн долоо хоногт үйлдвэрийн хэмжээнд хөдөлмөрийн аюулгүй байдал, эрүүл ахуйн зөрчил дутагдалгүй ажиллаж, дөрөвдүгээр шатны үзлэг Цахилгаан цехэд хийгдсэнийг ХАБЭА-н хэлтсээс мэдээлэв. Шалгалтын комиссын зүгээс Цахилгаан цехийн хөдөлмөрийн аюулгүй ажиллагаанд 91.6 хувь буюу “сайн” үнэлгээ өгсөн байна. Тус хэлтсээс хөрс хуулалт, уулын цул тээвэрлэлтийн ажилд гаднын компанийн хүнд даацын техник түрээслэх болсонтой холбоотойгоор тэдгээрийн аюулгүй байдалд "Эрдэнэт" сувиллын цогцолбор, Гал унтраах 58-р анги, Гэрээт цагдаагийн хэлтэстэй хамтран шалгалт хийж, ХАБЭА-н зааварчилгаа өгөхийн зэрэгцээ гарсан зөрчил, дутагдлыг шуурхай арилгахаар ажиллаж буйг мэдээллээ.
Байгаль орчин, ногоон хөгжлийн хэлтсээс үйлдвэрлэлийн бүсэд хяналт шалгалтаа үргэлжлүүлж, 9-р овоолгын дор 30 мянган метр куб бассейн барих ажлыг техникийн зөвлөлд танилцуулан хэлэлцүүлсэн байна. Түүнчлэн 9А овоолгоос ялгарч буй хүчлийн уснаас мал амьтан уухаас сэргийлэн хамгаалалтын хашаа хаалтыг Гал унтраах 58-р ангитай хамтран барьж дуусгажээ. Сэлэнгэ аймагт хийж буй техникийн нөхөн сэргээлтийн ажил 325 га талбай буюу 40 хувийн гүйцэтгэлтэй, хэвийн үргэлжилж байна.
Уулын цул тээвэрлэлт, хөрс хуулалтын ажилд түрээсээр ажиллах хүнд даацын техникүүд өнгөрөгч ням гаргаас ажилд гарсан байна. Туршилтын эхний өдөр нийт 113 эргэлт хийж, хэвийн ажилласан тухай Үйлдвэрлэл, техникийн хэлтсээс мэдээллээ. Үйлдвэрийн хэмжээнд намар, өвлийн бэлтгэл ажлын хүрээнд үндсэн технологийн тоног төхөөрөмж, эрчим хүчний тоног төхөөрөмж болон системийн бэлтгэл, аж ахуй, нийгмийн барилга байгууламж, түүхий эд материал бэлтгэх чиглэлээр нийт 293 ажил төлөвлөснөөс өнөөдрийн байдлаар гүйцэтгэл 9.22 хувийн биелэлттэй байна. Тэдгээрийн 27 нь 100 хувь биелж, 14 ажил 80-99 хувийн гүйцэтгэлтэй үргэлжилж буй аж. Эхлэх хугацаа хүлээгдэж буй ажил 122 буюу 41.6 хувийг эзэлж байна.
Баяжуулах үйлдвэрт бүтээн байгуулалтын ажлууд төлөвлөгөөний дагуу үргэлжилж байна. Энэ долоо хоногт Хаягдлын аж ахуйд барьж байгаа М5 далангийн ажил дуусах бол 1-р шугамын өргөтгөлтэй холбоотойгоор технологийн замын ажлыг эхлүүлэх ажлын хэсгийн шийдвэр гарчээ.
Нар минутад мандаж минутад жаргана.
Үс засуулвал: 
Суудал: 
