Монгол орны төв хэсэг “Эрдэнэтийн-Овоо”-ны орд газарт уулын баяжуулах үйлдвэр барьж байгуулах их үйл хэрэгт гар бие оролцож, Эрдэнэтийг бүтээлцсэн анхдагч, илгээлтийн эздийн 50 жилийн ой энэ онд тохиож байна.
Тэртээ 1974 оны намар илгээлтийн эздийн анхны цуваа Эрдэнэтийг зорин ирж, тэр цагаас хойш эх орны өнцөг булан бүрээс олон зуун залуус цуглаж, Зууны манлай үйлдвэр, Эрдэнэт хотыг бүтээн босгосон түүхтэй. Энэхүү түүхэн гавьяат үйлсийн эзэд, анхдагч, илгээлтийн эздийн суу алдар, нөр их хөдөлмөр зүтгэлийг алдаршуулан мөнхжүүлэх зорилгоор Орхон аймгийн Засаг Даргын Тамгын Газар, “Эрдэнэт үйлдвэр” ТӨҮГ-аас “Анхдагч, илгээлтийн эзэд”-ийн 50 жилийн ойг тэмдэглэж байна.
Эрдэнэт үйлдвэрийн бүтээн байгуулалтад эхнээс нь ажиллаж, ажил хөдөлмөрөө зориулсан анхдагч ахмадууд, илгээлтийн эздэд өнөөдөр түүхэн ойн медаль гардуулж, хүндэтгэл үзүүллээ. Тус үйл ажиллагаанд "Эрдэнэт үйлдвэр" ТӨҮГ-ын Ерөнхий захирал болон газар, хэлтсийн удирдлагууд оролцлоо.
Хүндэтгэлийн үйл ажиллагааг “Эрдэнэт үйлдвэр” ТӨҮГ-ын Ерөнхий захирал Г.Ёндон нээж, одоогоос хагас зуун жилийн тэртээ "Эрдэнэтийн-Овоо"-г зорин, 20-р зууны манлай бүтээн байгуулалт Эрдэнэт үйлдвэр, Эрдэнэт хотыг бүтээн босгосон анхдагч, илгээлтийн эзэд, ахмадууддаа түүхт 50 жилийн ойн баярын мэндчилгээ дэвшүүлэв. Тэрээр хэлсэн үгэндээ, анхдагч илгээлтийн эздийн түүхэн бахархалт үйлсийг үеийн үед эгнэгт санаж дурсан, хүндэтгэх учиртайг онцлон, “Эрдэнэт үйлдвэрийн баялаг бүтээгч уурхайчин хамт олон бид, анхдагч, илгээлтийн эзэд, ахмадууд та бүхнийхээ залгамж чанарыг хадгалж, улс эх орныхоо хөгжил дэвшилд үргэлж манлайлагч, тулах багана, тулгуур хүч байх эрхэм үүргээ нэр төртэй биелүүлэхийн төлөө хичээнгүйлэн ажиллаж байгааг онцлон тэмдэглэе” гэсэн юм.
Мөн Эрдэнэт үйлдвэрийн анхдагч, тус үйлдвэрийн Ахмадын нэгдсэн зөвлөлийн дарга Д.Байгаль, 31 насандаа Монгол Улсын Хөдөлмөрийн баатрын цол хүртсэн, ууган баатар Д.Жаргалсайхан нар анхдагч илгээлтийн эзэддээ хандан баярын мэндчилгээг чин сэтгэлийн халуун дотно талархал, бахархлын үгтэй хамтатган дэвшүүллээ.
Эрдэнэт үйлдвэрийн шавыг тавилцахаас эхлээд ашиглалтад оруулах хугацаанд тухайн үеийн нам засаг, залуучуудын байгууллагын илгээлт, томилолтоор нийт 1000 гаруй анхдагч, илгээлтийн эзэд ажилласан тухай түүхийн баримт бичигт тэмдэглэгдсэн байдаг. Тэдний 580 гаруй нь өнөөдөр түүхэн ойн хүндэтгэлийн үйл ажиллагаанд оролцож байгаа аж.
Эх орныхоо хөгжил дэвшилд оруулсан хувь нэмэр, хийсэн бүтээсэн бүхнийг нь гэрчлэх одон медалиа энгэртээ зүүж, нүдэндээ баярын мишээл тодруулан өөр хоорондоо хөөрөлдөх анхдагч ахмадууд, илгээлтийн эздэд зориулсан хүндэтгэлийн арга хэмжээ Эрдэнэт хотын сүлд дуу “Эрдэнэтийн-Овоо”-гоор түрлэг нэмж, дурсгалын зураг татуулснаар өндөрлөлөө.
Нар минутад мандаж минутад жаргана.
Үс засуулвал: 
Суудал: 
