Аж үйлдвэр, эрдэс баялгийн сайд Ц.Туваан Эрдэнэт үйлдвэрийн ажилтнуудтай хийсэн уулзалтын үеэр тус үйлдвэрээс төрөн гарсан 9 дэх Хөдөлмөрийн баатар Ш.Даваахүүд, УИХ-ын гишүүн С.Эрдэнэболд, “Эрдэнэт үйлдвэр” ТӨҮГ-ын Ерөнхий захирал Г.Ёндон нарын хамтаар баяр хүргэж, хүндэтгэл үзүүллээ. Эрдэнэт үйлдвэрийн Спорт цогцолборын дарга, Монгол Улсын Гавьяат тамирчин, Үндэсний сурын Дархан мэргэн, Зууны манлай сурын харваач Шагжсүрэнгийн Даваахүүд саяхан болж өнгөрсөн үндэсний их баяр наадмын өмнө Монгол Улсын Ерөнхийлөгчийн зарлигаар Хөдөлмөрийн баатар цол хүртээсэн юм.
Уурхайчин хамт олны дундаас төрийн өндөр дээд цол хүртэж, хөдөлмөрийн баатар төрсөнд салбарын сайдын хувьд сэтгэл туйлын өндөр буйгаа Аж үйлдвэр, эрдэс баялгийн сайд Ц. Туваан илэрхийлээд, шинэхэн баатартаа алд цэнхэр хадаг, мөнгөн аягатай сүү, цэцгийн баглаа барилаа. Мөн энэ үеэр УИХ-ын гишүүн С.Эрдэнэболд, Хөдөлмөрийн баатар Ш.Даваахүүд баяр хүргэхийн ялдамд Монголын Байт харвааны холбооны Удирдах зөвлөлийн гишүүнээр ажиллаж, уг спортыг хөгжүүлэх, өвлүүлэн үлдээхэд үнэтэй хувь нэмэр оруулж байгааг тэмдэглэн, талархал илэрхийлэв.
Аливаа амжилтын ард олон хүний сэтгэл зүтгэл, маш том баг байдаг. Түүн лугаа миний амжилтын ард Эрдэнэт үйлдвэр бүтнээрээ байдаг. Бүхий л цаг үед бүх талын тусламж дэмжлэг, нөөц боломжоор хангаж, хамтран ажилласны үр дүнд төрийн дээд шагнал ирсэн гэж бодож байна. Одоогоос 35 жилийн өмнө, тухайн үед Эрдэнэт үйлдвэрийн анхны Монгол ерөнхий захирлаар ажиллаж байсан Ш.Отгонбилэг захирал, Эрдэнэт хотод үндэсний сурын спортыг хөгжүүлж, өвлүүлэн үлдээх санал тавьж байлаа. Тэр цагаас өнөөг хүртэл энэ үйлсэд гар бие зүтгэхийн зэрэгцээ өөрийн спортын амжилтаа ахиулахын төлөө хичээж ирснийг маань өндөр дээд шагналаар үнэлсэнд их баяртай байна. Хамт олондоо маш их баярлалаа” хэмээн Монгол Улсын Хөдөлмөрийн баатар, Үндэсний сурын харвааны Дархан мэргэн Ш.Даваахүү энэ үеэр сэтгэгдлээ хуваалцлаа.
Нар минутад мандаж минутад жаргана.
Үс засуулвал: 
Суудал: 
