“Мэдлэг түгээх ажлын байр” төсөл Эрдэнэт үйлдвэрийн ДЦС-д хэрэгжиж эхэллээ. Ажилтнуудад ажлын байраар нь дамжуулан мэдлэг түгээх, хадгалж үлдээх, мэдлэг туршлагаа харилцан хуваалцах зорилготой “Мэдлэг түгээх ажлын байр” төслийг Хүний нөөц, захиргааны хэлтсээс санаачлан үйлдвэрийн хэмжээнд хэрэгжүүлж байна. ДЦС-ийнхан уг төслийн хүрээнд Турбины машинчийн ажлын байрыг сонгож хэрэгжүүлж буйгаа танилцуулав. Энэ үйл ажиллагаанд “Эрдэнэт үйлдвэр” ТӨҮГ-ын Хүний нөөц, захиргааны хэлтсийн дарга О.Отгонбаяр, ДЦС-ын дарга Г.Мөнх-Эрдэнэ болон бусад мэргэжилтнүүд оролцож, ДЦС-ын Турбины хэсгийн турбин ашиглалтын мастер Б.Пүрэвсайхан Турбины машинчийн ажлын байрны онцлог, мэргэжлийн цар хүрээ түүнийг дагасан мэдлэг, ур чадвар, ажилтнуудад өгөх үр өгөөжийн талаар илтгэл, танилцуулга хийлээ.
ДЦС-ын ажлын байранд хэрэгжүүлэх “Мэдлэг түгээх ажлын байр” төслийг бид Турбины машинчийн ажлын байрнаас эхэлж байна. Учир нь Турбины машинчийн мэргэжил онцлогтой. Тухайлбал, нарийн мэргэжил учраас ажилтнаас өндөр ур чадвар, анхаарал сэрэмж шаарддаг. Өөрөөр хэлбэл, эрсдэлтэй ажлын байр учраас хөдөлмөрийн аюулгүй байдлыг чанд сахиж ажилладаг. Нөгөөтээгүүр, эрчим хүчний системд мөрдөгддөг техник ашиглалтын дүрэмд Турбины машинчийн хөдөлмөрийн эрх, үүргийг заасан байдаг. Ийм олон талын мэдлэг ур чадвар шаарддаг ажлын байр учраас сонгож авсан. Энд мэдлэг түгээх төсөл хэрэгжүүлснээр ажилтнууд хоорондоо мэдлэг туршлагаа солилцож түгээх, хадгалах, илүү сайжруулах боломж нээгдэж байгаа. Хүний нөөцөө бэлтгэх, чадавхжуулахад маш өндөр үр дүнтэй ажил болж байна, гэж ДЦС-ын Турбины хэсгийн дарга Ч.Баярмагнай ярилаа.
Харин ДЦС-ын Турбины хэсгийн турбин ашиглалтын мастер Б.Пүрэвсайхан, “Миний хувьд, ажлын байраар дамжуулан мэдлэг түгээж эхэлснээр ажилтнуудын идэвх оролцоо, хандлага, хийж бүтээх хүсэл эрмэлзэл нэмэгдэж, дээшилж байгаа нь харагдаж байгаа. Тиймээс зөвхөн Турбины машинчийн ажлын байраар хязгаарлагдахгүйгээр бүх ажлын байранд онцлогт нь нийцүүлэн үе шаттай, тасралтгүй хэрэгжүүлэх нь зүйтэй юм” гэв.
Нар минутад мандаж минутад жаргана.
Үс засуулвал: 
Суудал: 
