Эрдэнэт үйлдвэрийн Спорт цогцолборын дарга, МУГТ, Дархан мэргэн харваач Ш.Даваахүү, Хөдөлмөрийн баатар цол хүртлээ
Эрдэнэт үйлдвэрийн удирдлагуудын даваа гаригийн ээлжит шуурхай зөвлөгөөний онцлох мэдээ энэ байлаа. Монгол Улсын Ерөнхийлөгчийн зарлигаар “Эрдэнэт үйлдвэр” ТӨҮГ-ын Спорт цогцолборын дарга, Монгол Улсын Гавьяат тамирчин, үндэсний сурын Дархан мэргэн харваач Шагжсүрэнгийн Даваахүүд, Монгол Улсын Хөдөлмөрийн баатар цол хүртээснээр тус үйлдвэрийн хамт олон 9 дэх баатраа өлгийдөн авч байна. Тэрээр Эрдэнэт үйлдвэрийн Спорт цогцолборт дасгалжуулагч, арга зүйч, ахлах дасгалжуулагч, цогцолборын даргаар нийт 30 гаруй жил ажиллаж, үндэсний өв соёл монгол сурын харвааг хөгжүүлэх, хойч үедээ өвлүүлэн, хадгалж үлдээхэд үнэтэй хувь нэмрээ оруулсаар ирсэн юм. Завхан аймгийн Тосонцэнгэл сумын харьяат Ш.Даваахүү мэргэний сурын спортын амжилтын замнал 1990 онд сумынхаа аварга шалгаруулах тэмцээнд 19 онож түрүүлснээр эхэлсэн бол Монгол түмний их цэнгэл баяр наадам, Үндэсний сурын түүхэнд 40 сумнаас ганц ч алдалгүй буюу 40 онон түрүүлсэн анхны бөгөөд ганцхан харваач болжээ. Түүний энэхүү түүхэн амжилт, гавьяаг Ерөнхий захирал Г.Ёндон шуурхай зөвлөгөөний үеэр онцлон, Хөдөлмөрийн баатар хэмээх алдар хүндтэй шагнал гардан авч буй торгон агшинд хамт олны зүгээс халуун баяр уламжлах нь зүйтэйг онцлон тэмдэглэв.
Ээлжит “Их зогсолт”-ын ажил эхлэхэд бэлэн болжээ
Энэ сарын 30-нд Эрдэнэт үйлдвэрийн хэмжээнд хийгдэх “Их зогсолт” эхлэхэд бэлэн болжээ. Энэ тухай Механикийн хэлтсийн дарга, “Их зогсолт”-ын ажлын штабын дарга Б.Чинзориг дэлгэрэнгүй мэдээлэл өгөв. Өөрөөр хэлбэл, энэ үеэр ажиллах хүн хүч, гадны байгууллагуудын ажлын хуваарь, засварын тоног төхөөрөмж, багаж хэрэгслийн тоноглол, хэмжилтийн жагсаалт, ажилчдын халуун хоол зэрэг үйлдвэрлэлийн талаас шаардлагатай бүхий л бэлтгэл хангагдсан байна. Бараа материалын хангамж, нийлүүлэлтийн 50 гаруй хувийг татан авсан бол үлдсэн хувийг энэ сарын 26-нд сүүлийн байдлаар нийлүүлэх юм байна. Эрдэнэт үйлдвэр жил тутамд нэг удаа үйлдвэрлэлийн үйл ажиллагаандаа тэг зогсолт хийж, технологийн нөөцгүй ажиллагаатай техник тоног төхөөрөмжүүдийн найдвартай, тасралтгүй, аюулгүй байдлыг хангах зорилгоор иж бүрэн засвар үйлчилгээ хийдэг. Энэ удаагийн “Их зогсолт”-ыг энэ сарын 30-ны 20.00 цагаас 8 сарын 1-ний 20.00 цаг хүртэл хийж гүйцэтгэх юм.
Баяр наадмын өдрүүдэд хөдөлмөрийн аюулгүй байдлыг чандлан сахиж, хариуцлагатай ажиллахыг анхаарууллаа
Үйлдвэрлэлийн тасралтгүй горимтой Эрдэнэт үйлдвэр Үндэсний их баяр наадмын амралтын өдрүүдэд хариуцлагатай жижүүр гарган ажиллуулдаг. Энэ дагуу Ерөнхий захирлын тушаал гарч, хариуцлагатай жижүүр болон баярын өдрүүдэд ажиллах албан хаагчдын ажлын хуваарь батлагдаж буйг шуурхайн зөвлөгөөнөөр онцолсон. Энэ жилийн баяр наадмын амралт 5 өдөр үргэлжлэх бөгөөд тушаалаар ажиллах ажилтнууд онцгой сонор сэрэмж, анхааралтай байж, хөдөлмөрийн аюулгүй байдлыг өндөр хэмжээнд сахиж ажиллахыг үйлдвэрийн удирдлагын зүгээс чиглэл болгов. Мөн цех нэгжүүд дотоод хөдөлмөр зохион байгуулалтаа нарийн төлөвлөж, удирдах ажилтнуудад ээлжийн болон баярын амралтаа эдлэхдээ ээлжлэх, солигдох зэргээр зохицуулж, хариуцлагатай ажиллах үүрэг өглөө.