Орос сургуулийн захирлыг үдэж мордуулав

Эрдэнэт үйлдвэрийн дэргэдэх Орос 19 дүгээр сургуулийн захирал Ирина Александровна Ерастоваг нутаг буцахад нь үйлдвэрийн газрын нийгмийн цехийн удирдлагууд, журмын нөхөд нь дөрөөг нь мялаан үдэж мордууллаа. И.А.Ерастова нь 1990 оноос хойш боловсролын байгууллагад 33 жил ажилласан бөгөөд үүнээс “Эрдэнэт үйлдвэр” ТӨҮГ-ын дэргэдэх Ерөнхий боловсролын 19 дүгээр сургуульд орос хэл, уран зохиолын багшаар хоёр жил, 2023-2024 оны хичээлийн жилд захирлаар амжилттай ажилласан юм. Түүнийг 2022-2023 оны хичээлийн жилд Орос хэлний багшаар ажиллаж байх хугацаанд ЭЕШ-ын Орос хэлний төрөлд бэлтгэсэн таван сурагч нь дээд үнэлгээ 800 оноо авч, онцгой амжилт гаргаж байв.  
И.А.Ерастовагийн Монгол улсын боловсролын системд оруулсан хувь нэмрийг үнэлж, 2022 онд Оросын Холбооны Бүгд Найрамдах Буриад Улсын Хиагт хотын Ерөнхий боловсролын 4-р сургуулийн “Хүндэт жуух бичиг”, Орхон аймгийн БШУГ-ын Талархлын бичиг, 2023 онд “Россотрудничество” агентлагийн Монгол дахь Төлөөлөгчийн газрын “Хүндэт жуух бичиг”, Орхон аймгийн Засаг даргын “Хүндэт жуух бичиг”, энэ онд Монголын Эмэгтэйчүүдийн Холбооны дурсгалын тэмдгээр тус тус шагнаж байсан юм. 
Орос 19 дүгээр сургуулийн захирал Ирина Александровна Ерастоваг Танд Эрдэнэт хотын мянга мянган шавь нарынх нь өмнөөс аяны алтан шар зам нь өлзийтэй байхын ерөөл өргөж, амьдралын хамгийн сайн сайхан бүхнийг хүсье.