Шуурхайн тойм мэдээлэл

Эрдэнэт үйлдвэрийн удирдлагуудын даваа гаригийн ээлжит шуурхай хуралдаж, ирэх сарын 30-нд эхлэх “Их зогсолт”-ын бэлтгэл ажлын явцын талаар онцлов.
“Их зогсолт”- ын бэлтгэл ажил хангах чиглэл бүхий штаб өнгөрсөн долоо хоногт хуралдсан байна. Нийт 102 худалдан авалтын тендер шалгаруулалт зарлагдах төлөвлөгөөтэй байгаагаас одоогийн байдлаар 82 шалгаруулалт зарлаж, зохион байгуулсан тухай Механикийн хэлтсийн дарга Б.Чинзориг мэдээллээ. Үлдэж буй тендер шалгаруулалттай холбоотой асуудлыг энэ долоо хоногт Штабын хурлаар хэлэлцэж, эцэслэн шийдвэрлэх юм байна. Энэ жилийн “Их зогсолт”-ыг ирэх сарын 30-нд зохион байгуулах бөгөөд бусад ажлууд төлөвлөгөөний дагуу хийгдэж байна. 
Эрдэнэт үйлдвэрийнхэн энэ сарын эхний 20 хоногт 1445 мянган метр куб уулын цул гаргаж, 721 мянган метр куб хөрс хуулалтын ажил гүйцэтгээд байна. Ил уурхайд 102 мянган тонн хүдэр олборлож төлөвлөгөө 86.2 хувьтай байгаа бол 2053 мянган тонн хүдэр боловсруулснаар төлөвлөгөөт үзүүлэлт 90.1 хувийн явцтай буй аж. Харин хүдэр дэх зэс, молибдены агуулгын төлөвлөгөө сарын эхний 20 хоногт 100.6-111.8 хувиар, металл авалт 97-101.4 хувиар биелжээ. Мөн баяжмал дахь зэс, молибдены агуулга 101.7-103.2 хувиар  биелсэн дүнтэй байна. Уурхайчид сарын эхний 20 хоногт 30581 тонн зэсийн баяжмал ачуулсан бол баяжмалын чанар 102.3 хувиар биелж буйг Үйлдвэрлэл, техникийн хэлтсийн дарга Т.Түмэн-Өлзий мэдээлэв. 
Үйлдвэрийн хэмжээнд хавар зуны бэлтгэл ажлын төлөвлөгөө 94 хувийн гүйцэтгэлтэй байна. Энэ хүрээнд нийт 294 ажил төлөвлөснөөс 250 нь 100 хувь хийгджээ. Өнөөдрийн байдлаар, эхлэх хугацаа нь хүлээгдэж буй 4 ажил байгаа аж. Бүтцийн нэгжүүдээс Геологи хайгуулын экспедиц, Барилга засварын цех, Судалгаа шинжилгээний хүрээлэн, Эрдэнэт цогцолбор дээд сургууль, Спорт цогцолбор, Цахилгаан цех, Засвар механикийн завод, Эрдэнэт сувиллын цогцолбор, Засвар угсралтын цех зэрэг 9 цех нэгж хавар, зуны бэлтгэл ажлаа бүрэн хангажээ.