“Эрдэнэт үйлдвэр” ТӨҮГ 2024 оноос эхлэн нийт эдийн засагч, санхүү, нягтлан бодох бүртгэл, дотоод хяналтын ажилтнуудаа чадавхжуулах, тэдэнд тасралтгүй боловсрол олгох зорилгоор “Хөгжлийн цогц” хөтөлбөр хэрэгжүүлэн ажиллаж байна. Энэхүү хөтөлбөрийн хүрээнд Санхүү, нягтлан бодох бүртгэлийн хэлтэс, Нягтлан бодох бүртгэлийг хөгжүүлэх сантай хамтран “Санхүүгийн тайлагнал, санхүүгийн тайлагналын шинжилгээний арга зүй” сэдэвт сургалтыг өнөөдөр зохион байгуулав.
Сургалтанд Монгол Улсын гавьяат эдийн засагч, доктор, профессор, Монгол Улсын мэргэшсэн нягтлан бодогч Р.Батжаргал, Монгол Улсын мэргэшсэн нягтлан бодогч, мэргэшсэн үнэлгээчин, магистр Б.Наранбаатар нар “НББ-ийн хууль, эрхзүйн зохицуулалт”, “Орлогын бүртгэлийн тусгай бодлого”, “Хөрөнгийн стандартын хэрэглээ”, “Санхүүгийн тайлагналын шинжилгээний арга зүй” зэрэг сэдвээр дэлгэрэнгүй мэдээлэл хийж, оролцогчдын санал бодлыг сонслоо.
Эрдэнэт үйлдвэрийн Ерөнхий нягтлан бодогч бөгөөд Санхүү, нягтлан бодох бүртгэлийн хэлтсийн дарга Д.Баярбат хэлэхдээ: Энэ удаа “НББ-ийн хууль, эрх зүйн зохицуулалт, орлого, зарлагын бүртгэлийн тусгай бодлого, хөрөнгийн стандартын хэрэглээ, ашигт малтмалын нөөцийн хайгуул ба үнэлгээ, үндсэн хөрөнгийн бодит үнэ цэнийн тооцоолол, бүртгэл, тайлагнал, санхүүгийн тайлангийн шинжилгээний талаар илтгэл тавьж хэлэлцүүллээ. Мөн “Хууль, тогтоомж, дүрэм, журам, аргачлал -жишээ”, “Санхүү, нягтлан бодох бүртгэлийн албаны үүрэг, хариуцлага”, “НББ-ийн бодлогын агуулга, зорилго”, “Харилцагчтай байгуулсан гэрээний орлого”, “Өртгийн бүртгэл, Санхүүгийн тайлагналын уялдаа”, “Ашигт малтмалын нөөцийн хайгуул ба үнэлгээ”, “Хайгуул болон олборлох үйл ажиллагааны нягтлан бодох бүртгэл”, “Санхүүгийн тайлангийн шинжилгээний агуулга, ач холбогдол”, “Хөрөнгө, капиталын бүтэц, бүрэлдэхүүн, динамикийн шинжилгээ”, “Төлбөрийн чадварын өнөөгийн боломжийг үнэлэх үзүүлэлтүүд”, “Санхүүгийн тогтвортой байдлын шинжилгээ”, “Үйл ажиллагааны үр дүнг үнэлэх”, “Мөнгөн гүйлгээний шинжилгээ” зэрэг олон сэдвийг хөндөж ярилцсан маш ач холбогдолтой сургалт боллоо” гэв.
Уг мэргэжлийн сургалтанд Эрдэнэт үйлдвэрийн 100 гаруй эдийн засагч, нягтлан бодогчид оролцлоо.
Нар минутад мандаж минутад жаргана.
Үс засуулвал: 
Суудал: 
