Эрдэнэт үйлдвэрийн Эмэгтэйчүүдийн холбоо уурхайчин бүсгүйчүүдийнхээ хөгжилд түлхүү анхаарч, цуврал сургалтуудыг зохион байгуулсаар байна. Өнөөдөр үйлдвэрийн газрын бүтцийн нэгжийн 450 эмэгтэй 07.00 цагт Соёл, урлагийн цогцолборын их танхимд эртлэн цуглаж, “Уурхайчин эмэгтэйчүүдийн манлайлал” сургалтад хамрагдлаа. Өглөөлөг уурхайчин бүсгүйчүүдийн шугаман бүжгээр эхэлсэн нь сургалтад оролцогчдын сэтгэлийг сэргээж, шинэ долоо хоногийн ажлаа эрч хүчтэй эхлүүлэх нөхцөлийг бүрдүүлсэн. Энэхүү үйл ажиллагаанд Орхон аймгийн Эмэгтэйчүүдийн зөвлөлийн Тэргүүн, “Эрдэнэт үйлдвэр” ТӨҮГ-ын Захиргаа, удирдлага, санхүүгийн газрын дарга Д.Үүрийнтуяа, Хүний нөөц, захиргааны хэлтсийн дарга О.Отгонбаяр нар оролцож, манлайллын туршлагаа хуваалцахын сацуу эмэгтэйчүүд гэр бүлд, хамт олонд, цаашлаад нийгэмд ямар эерэг нөлөө үзүүлдгийг, шинэлэг хандлага, ёс суртахуун, сэтгэл ханамж бий болгодгийг онцлоод, өглөө бүхний эхлэл болдог ээжүүд, эмэгтэйчүүдэд сайн сайхныг хүсэв.
Хөгжилд тэмүүлэгч, эртэч бүсгүйчүүдэд Эрдэнэт үйлдвэрийн ХАБЭА-н сургалтын мэргэжилтэн, доктор П.Мөнхтуяа “Үлгэр жишээ манлайлал” сэдвээр сургалт явуулж, эмэгтэйчүүд ба манлайлал, манлайлагчийн чухал чанар, түвшин, үүрэг, түүнийг хөгжүүлэх арга, харилцаагаа сайжруулах зөвлөмж, сонсох чадвараа сайжруулах зөвлөгөө, бусдад таалагдах урлаг буюу харизмын талаарх мэдлэгээ хуваалцав. Харин Эмэгтэйчүүдийн холбооны Тэргүүлэгч, Цахилгаан цехийн инженер М.Мөнхчимэг Австралийн Засгийн газрын богино хугацааны сургалтын тэтгэлэгт хөтөлбөрт хамрагдсан талаар мэдээлэл хийсэн бол цахилгаанчин О.Уянга Австралид бүтэн жил суралцсан туршлагаа хуваалцаж, өөрийгөө хөгжүүлэх боломж, манлайллын талаар мэдлэгээ түгээсэн юм.
Эрдэнэт үйлдвэрийн Эмэгтэйчүүдийн холбооноос зохион байгуулж буй эмэгтэйчүүдийн манлайллын өглөөлөг лхагва гарагт нийгмийн цехийн бүсгүйчүүд оролцсоноор үргэлжилнэ.
Нар минутад мандаж минутад жаргана.
Үс засуулвал: 
Суудал: 
