Эрсдэлийн удирдлагын сургалт зохион байгуулав

“Эрдэнэт үйлдвэр” ТӨҮГ, “Эрдэнэс Монгол” ХХК-тай хамтран “Нэгдлийн эрсдэлийн удирдлагын тогтолцоог бэхжүүлэх нь “ сэдэвт танхимын сургалтыг өнөөдөр зохион байгуулав. Сургалтанд “Эрдэнэт” үйлдвэр ТӨҮГ, Хөтөлийн “Цемент шохой” ХХК, “Дарханы төмөрлөгийн үйлдвэр” ТӨХК-ийн төлөөлөл оролцлоо. Энэ үеэр “Эрдэнэс Монгол” ХХК  болон Монголын үндэсний дотоод аудиторуудын холбооны сургагч багш нар тодорхой сэдвийн хүрээнд мэдээлэл хийж, оролцогчидтой санал бодлоо солилцсон юм. 
Тэд “Эрсдэлийн удирдлагын ач холбогдол ба сайн засаглал”, “Эрсдэлийн удирдлагын сайн туршлага, баримт бичиг”, “Нэгдлийн эрсдэлийн удирдлагыг хэрэгжүүлэх жишиг аргачлал”, “Эрсдэлийн сан үүсгэх, үнэлэх”, “Эрсдэлээ хэрхэн удирдах вэ”, “Эрсдэлийн хариу арга хэмжээний төлөвлөгөө боловсруулах нь” сэдвээр сургалтанд оролцогчдод онол арга зүйн зөвлөгөө өглөө. 
Энэхүү сургалтын ач холбогдлын талаар “Эрдэнэс Монгол” компанийн Дотоод хяналт, эрсдэлийн удирдлагын ахлах менежер Л.Наранчимэг хэлэхдээ: “Эрдэнэс Монгол” ХХК-иас “Нэгдлийн эрсдэлийн удирдлагын тогтолцоог бэхжүүлэх нь “ сэдэвт сургалтын хөтөлбөр баталсан. Уг хөтөлбөрийн хүрээнд үе шаттай сургалтууд явагдаж байна. Эхнийх нь эрсдэлийн удирдлагыг хэрэгжүүлэхэд оролцдог мэргэжлийн баг бүрэлдэхүүн буюу дотоод хяналт, эрсдэлийн удирдлагын чиг үүрэгтэй газар, нэгжийн ажилтнуудыг мэдлэг, мэдээллээр хангах, чадавхжуулах сургалт юм. Өөрөөр хэлбэл үйлдвэрлэлийн үйл ажиллагаа явуулдаг ижил төстэй чиг үүрэгтэй компанийн төлөөлөлүүд  энэ сургалтад хамрагдлаа. Эдгээр хүмүүст тулгарч буй асуудалд эрсдэлийн удирдлагыг хэрхэн сонгомол утгаар нь хэрэгжүүлэх талаар онол, практик хосолсон сургалт  боллоо. Дараагийн шатанд удирдах албан тушаалтнууд эрсдэлийн удирдлагыг хэрхэн хэрэгжүүлэх, эрсдэлийг удирддаг менежер ямар түвшинд байвал зохистой вэ гэсэн мэдлэг, мэдээлэл олгох сургалт явуулахаар төлөвлөөд байна” гэв.