Оны эхний 5 сард уурхайчид 16954 мянган тонн хүдэр олборлож, 15869 мянган тонн хүдэр боловсрууллаа

Эрдэнэт үйлдвэрийн 2024 оны эхний 5 сар болон өнгөрсөн 5 дугаар сарын үйлдвэрлэлийн төлөвлөгөөний биелэлт гарлаа. Энэ хугацаанд уулын цул гаргалт 94.2-95.1 хувь, хөрс хуулалт 87.6-88.5 хувийн гүйцэтгэлтэй гарсан бол хүдэр олборлолт 100.8-101.5 хувиар биелсэн байна. Өөрөөр хэлбэл, оны эхний 5 сард 16954 мянган тонн, өнгөрсөн 5 дугаар сард 3531 мянган тонн хүдэр олборлолоо. Баяжуулах үйлдвэрт эхний 5 сард 15714 мянган тонн хүдэр өгснөөр төлөвлөгөөг 100.6 хувиар биелүүлэв. Дээрх хугацаанд нийт 1240 мянган тонн исэлдсэн хүдэр олборлож, төлөвлөгөөт үзүүлэлтийг 102.6 хувиар давуулжээ.
Оны эхнээс 256640 тууш метр, 48900 тууш метр тус тус өрөмдөж, төлөвлөгөө 102-107.1 хувиар биелсэн байна. Хүдэр боловсруулалт 100-101.6 хувиар биелсэн дүнтэй байна. Тодруулбал, оны эхнээс 15869 мянган тонн, өнгөрөгч 5 дугаар сард 3237 мянган тонн хүдэр боловсрууллаа.  Хүдэр дэх металлын агуулга 100.5-101.1 хувиар зэсийн металл авалт 100.89 хувийн биелэлттэй байна. Хуурай жингээр зэсийн баяжмал гаргалтын төлөвлөгөө оны эхний 5 сарын байдлаар 102.6 хувиар биелсэн бол ачигдсан зэсийн баяжмалын төлөвлөгөө 101.4  хувь, молибдены баяжмалын төлөвлөгөө 106.7 хувиар давж биеллээ. Түүнчлэн ачигдсан зэс, молибдены баяжмалын чанар 22.41-50.57 хувь буюу төлөвлөгөө 101.9-105.4 хувиар биелснийг Үйлдвэрлэл, техникийн хэлтсээс мэдээллээ.