“Хүүхэд та эх орны ирээдүй” сэдэвт нээлттэй хаалганы өдөрлөг боллоо

Эрдэнэт үйлдвэрийн дэргэдэх Дотоодын цэргийн 816-р ангийн бие бүрэлдэхүүн Олон улсын хүүхдийн эрхийг хамгаалах өдрийг тохиолдуулан “Хүүхэд та эх орны ирээдүй” сэдэвт нээлттэй хаалганы өдөрлөг зохион байгууллаа. Нээлттэй хаалганы өдрөөр хүүхдүүдийн дунд зургийн уралдаан, сагсан бөмбөгийн болон дууны тэмцээн зохион байгууллаа. Түүнчлэн унадаг дугуй, скүүтэр, “Өргөө” театрт кино үзэх эрхийн бичгийн хонжворт сугалаа явуулсан юм. Дотоодын цэргийн 816-р ангийн захирагч, дэд хурандаа Д.Гантөмөр: “Жил бүрийн энэ өдрийг манай анги байгууллагууд ач холбогдол өгч тэмдэглэдэг. Энэ ажлын хүрээнд Дотоодын цэргийн штаф маань Сүхбаатарын талбайд улсын хэмжээнд байгууллагаа сурталчлах нээлттэй хаалганы өдрийг зохион байгуулсан. Тэгвэл Эрдэнэтийнхээ Цэцэрлэгт хүрээлэнд албан хаагчдынхаа ар гэр, үр хүүхдүүдийн дунд зохион байгуулсан энэхүү өдөрлөгт 400 гаруй хүүхэд оролцлоо. Уг үйл ажиллагааны зорилго нь Хүүхдийн эрхийг хамгаалах өдрийг бүтээлчээр үр дүнтэй тэмдэглэн өнгөрүүлэх, 816-р ангиа сурталчлах, энд ажилладаг хүмүүс ямар чиг үүрэгтэй ажилладаг юм. Албан хаагчдын өмсөж буй хувцас, хэрэглэж байгаа техник хэрэгсэлээр танилцуулга гаргалаа. Манай албан хаагчдын авьяаслаг хүүхдүүд ая дуугаа өргөлөө. Мөн аав, ээж нь үр хүүхдэдээ урлагийн тоглолтоор бэлэг барилаа” гэв.