“Хүүхдээ сонсъё” чуулган боллоо

Орхон аймгийн Хүүхэд, гэр бүлийн хөгжил хамгааллын газар, Баяжуулах үйлдвэрийн Гэр бүл, эцэг эхийн зөвлөлтэй хамтран “Хүүхдээ сонсъё” чуулганыг өнөөдөр зохион байгуулав. Энэхүү чуулганы зорилго нь тус цехийн ажилтнуудын хүүхдийн эрхийн өнөөгийн байдал, тулгамдаж буй асуудлыг хэлэлцэх, тэдний үзэл бодол, байр суурийг сонсоход чиглэж байв. Чуулганд Баяжуулах үйлдвэрийн 13 хэсгийн ажилтнуудын 12-17 насны 120 хүүхэд оролцлоо. 
Орхон аймгийн Хүүхэд, гэр бүлийн хөгжил хамгааллын газрын дарга А.Наранболд чуулганыг нээж хэлсэн үгэндээ: “Эрдэнэт үйлдвэр бол манай хотын гол цөм. Энэ том байгууллага ямагт манлайлагч байдаг. Өнөөдөр Баяжуулах үйлдвэрийн ажилтнууд “Хүүхдээ сонсъё” чуулганыг анх санаачлан зохион байгуулсан нь онцлог юм. Монгол Улсын Хүүхдийн төлөө Үндэсний зөвлөлийн 2018 оны 01 тогтоолын дагуу хүүхдийн өмнө үүрэг хүлээх байгууллага болон Эцэг, эхийн зөвлөлүүд байгуулагдсан. Энэ байгууллага, зөвлөл нь хүүхдийн өмнө үүрэг хүлээж буй насанд хүрэгч хүн бүрийг идэвхжүүлэх, гэр бүлийн үйл ажиллагааг анхан шатны нэгж дээр дэмжих, хүүхэд хамгааллын тогтолцооны чухал нэгж юм. Мэдээж, хүүхдийг эцэг, эхчүүд насанд хүрэгчид хамгаална. Хүүхэд хамгааллын ямар ч хууль тогтоомж гарсан ч аав, ээжээс нь давж, хүүхэд багачуудыг хамгаалдаг тогтолцоо роботыг зохион бүтээж чадахгүйг дэлхий нийт хүлээн зөвшөөрсөн. Тэгэхээр эцэг, эхчүүд хүүхэд хамгааллын тогтолцооны төгс хувилбар юм. Хүүхэд хамгааллын тогтолцоог сайжруулахад өөр нэг гол оролцогч, манлайлагч нь хүүхэд, багачууд. Өнөөдөр энд хуран цугларсан хүүхдүүд Орхон аймгийн 32 мянган хүүхдийн өмнөөс өөрсдийн дуу хоолойг олон нийтэд хүргэхээр цаг зав гарган ирсэнд баяртай байна. Та бүхэн асран хамгаалагч эцэг, эхчүүдээрээ дамжуулан өөрсдийн дуу хоолойгоо хүргэснээр хүүхэд хамгааллын хууль тогтоомж бодлого шийдвэр хэрэгжвэл хүүхдийн эрх дархлагдан хамгаалагдана. Иймээс энэ үйл ажиллагааг санаачлан зохион байгуулсан Баяжуулах үйлдвэрийн Эцэг, эхийн зөвлөлд талархал илэрхийлье” хэмээн онцлов. 

Харин Баяжуулах үйлдвэрийн Хүний нөөцийн товчоон дарга Т.Тунгалагтамир хэлэхдээ: “Дэлхийн гэр бүлийн өдрийг угтан манай цехийн Эцэг, эхчүүдийн зөвлөлөөс олон талт ажил зохион байгуулж байна. Энэ ажлын хүрээнд Орхон аймгийн ЗДТГ-ын дэргэдэх Хүүхэд, гэр бүлийн хөгжил хамгааллын газартай хамтран “Хүүхдээ сонсъё” сэдэвт Баяжуулах үйлдвэрийн ажилтнуудын хүүхдийн чуулганыг зохион байгууллаа. Ер нь нийгэмд хүүхдийн эрх зөрчигдөх тохиолдол бий. Манай цехийн хувьд ээлжийн ажилтай хүмүүс олон. Ажлын ийм нөхцөлөөс шалтгаалан үр хүүхдэдээ чөлөөт цаг гаргах, тэднийг сонсох нь хязгаарлагдмал байдаг гэсэн судалгаа гарсан. Үүнтэй холбогдуулан үйлдвэрлэлийн тасралтгүй үйл ажиллагааг ханган ажиллаж буй ажилтнуудын хүүхдүүд ямар бодол санаа тээж явдаг, эрх ашиг нь хэрхэн хөндөгддөг талаар бүлгийн ажлаар хүүхдүүд санал бодлоо солилцлоо. Эндээс гарсан санал санаачилгад дүн шинжилгээ хийж, бид цаашдынхаа ажилд тусган ажиллана. Манай хамт олон 2024 онд “Хайр хүндлэл, хариуцлага амжилтын үндэс” уриан дор үйл ажиллагаагаа явуулахаар зарласан. Хайр хүндлэл, хариуцлагыг бид зөвхөн ажилтнууд руугаа биш, тэдний гэр бүл, үр хүүхэд рүү чиглүүлэн ажиллаж байна. Бид ажилтнуудынхаа ар гэрийн 160-аад гишүүдийг үйлдвэрлэлийн үйл ажиллагаа, орчин нөхцөлтэй танилцуулах аяллыг зохион байгууллаа. Ер нь гэр бүлийн анхаарал халамж сайжирснаар ажилтнууд бие сэтгэлээ ажилдаа сайн бэлтгэх, хөдөлмөрийн бүтээмж нь нэмэгдэнэ. Нөгөө талаар ажил, амьдралын тэнцвэрийг хадгалж ажиллана. Өөрөөр хэлбэл ажилтнуудынхаа гэр бүл, үр хүүхдэдээ зарцуулах цагийг нэмэгдүүлж, амралтын өдрүүдэд аль болохоор олон нийтийн ажил зохион байгуулахгүй байхаар төлөвлөн ажиллаж байна” гэв.