Белазын жолооч нарын хөдөлмөрийн нөхцөлийг “хортой” ангилалд шилжүүллээ

“Эрдэнэт үйлдвэр” ТӨҮГ-ын Үйлдвэрчний Эвлэлийн холбооноос гаргасан “Тэтгэврийн хөнгөлөлттэй тогтоох газрын доор болон хөдөлмөрийн хортой, халуун, хүнд нөхцөлд хамаарах ажил, мэргэжлийн жагсаалт”-д үйлдвэрийн зарим ажлын байрыг нэмэлтээр оруулах, дүйцүүлэх, хасуулах санал дэмжигдсэн байна. 
Тус холбооны зүгээс эл саналаа өнгөрсөн 3 дугаар сард УИХ-ын Дэд дарга Л.Мөнхбаатарыг Эрдэнэт үйлдвэрийн ажилтнуудтай уулзах үеэр уламжилж, уурхайн хүнд нөхцөл нь урт хугацаандаа  ажилтны эрүүл мэндэд ноцтой хохирол учруулах эрсдэлтэй тул зарим ажлын байрны нөхцөлийн ангиллыг өөрчлөх үндэслэлийг тайлбарласан юм. 
 Тэгвэл өнөөдөр  Хөдөлмөр, нийгмийн хамгааллын сайдын “Тушаалын хавсралтад нэмэлт өөрчлөлт оруулах тухай” А/87 тоот тушаал гарч, дээрх асуудлыг уг тушаалд тусгасан тухай шийдвэрийг УИХ-ын Дэд дарга Л.Мөнхбаатар, Эрдэнэт үйлдвэрийн Үйлдвэрчний Холбооны удирдлагуудад танилцууллаа.
Ийнхүү тэтгэврийг хөнгөлөлттэй тогтоох ажил мэргэжилд бутлуурчин, цахилгаан тоног төхөөрөмжийн засварчин, операторч, хүнд даацын авто машины жолооч буюу 100.1 тонноос дээш даацын Белазын жолооч, хими цехийн аппаратчин зэрэг ажлын байрууд “Газрын доор, хөдөлмөрийн хортой, халуун, хүнд нөхцөлд хамаарах ажил мэргэжлийн жагсаалт”-д тусгагдаж байна. Ингэснээр дээрх ажлын байранд ажиллаж буй ажилтнууд хөнгөлөлттэй буюу 50 нас хүрсэн бол тэтгэвэрт гарах эрх үүсэх боломж бүрдэж байгаа юм.